अहमदनगर : जलसंधारण मंत्री शंकरराव गडाख यांचे बंधू प्रशांत गडाख यांच्या अधिपत्याखाली असलेल्या अहमदनगरच्या दंत महाविद्यालयातील कर्मचारी प्रतीक काळे याने आत्महत्या केल्याची घटना घडली आहे. दरम्यान, या घटनेप्रकरणी ७ जणांवर गुन्हा दाखल करण्यात आला असल्याचेही सांगण्यात येत आहे. चार दिवसांपूर्वी रात्रीच्या वेळेस नगर औरंगाबाद रोडवर प्रतीक याने आत्महत्या केली असून या घटनेने खळबळ उडाली आहे. या प्रकरणी संस्थेतील 7 जणांविरोधात अहमदनगरच्या MIDC पोलीस ठाण्यात गुन्हा दाखल करण्यात आला असून 4 जणांना पोलिसांनी अटक केली आहे. प्रतीक काळे याने काही वर्ष प्रशांत गडाख यांचे स्वीय सहाय्यक म्हणून काम पाहिल्याची देखील प्राथमिक माहिती आहे. अहमदनगर मधील प्रशांत गडाख यांच्या दंत महाविद्यालयात काम करणाऱ्या प्रतीक काळे याने तीन दिवसांपूर्वी औरंगाबाद रोडवर आत्महत्येपूर्वी व्हिडीओ व्हायरल करत व सोशल माध्यमांवर पोस्ट टाकून आत्महत्या केल्याची धक्कादायक घटना समोर आली. प्रतीक काळे या 27 वर्षीय तरुणाच्या आत्महत्या प्रकरणी आरोपींवर लवकरात लवकर कारवाई व्हावी या मागणीसाठी रस्ता रोको आंदोलन करण्यात आला होता. वंचित बहुजन आघाडीच्या वतीने पोलीस अधीक्षक कार्यालयासमोर हे आंदोलन करण्यात आलं होतं तर या आंदोलनाला नेवासा मतदार संघातील भाजपचे माजी आमदार बाळासाहेब मुरकुटे यांनी देखील पाठिंबा दिला होता. प्रतीक काळे याने सोशल माध्यमांवर केलेल्या सुसाईड नोटच्या आधारे चौकशी होऊन जलसंधारण मंत्री शंकरराव गडाख यांच्यासह सर्वांची चौकशी करून कारवाई करण्याची मागणी मुरकुटे यांनी केली आहे. घटनेनंतर मयत प्रतीक काळे यांच्या बहिणीच्या फिर्यादीवरून संस्थेतील 7 जणांविरोधात गुन्हा दाखल करण्यात आला असून यात गडाख कुटुंबाचा काहीही संबंध नसल्याचं बहिणीने स्पष्ट केलं आहे. त्याने व्हायरल केलेली ऑडिओ क्लिप दारूच्या नशेत केली असल्याचं बहिणीने सांगितले. प्रतीकने मला आत्महत्येपूर्वी फोनवर सगळं सांगितले होते. त्यामुळे यात गडाख दोषी असते तर आम्ही सोडलं नसतं असं सांगताना कोणीही राजकारण करू नये असं प्रतीक्षा हिने स्पष्ट केलं आहे. एकीकडे सोशल माध्यमात व्हायरल झालेला व्हिडिओ व पोस्ट यावरून गडाख विरोधक गडाख यांच्या वर कारवाई करण्याची मागणी करत असताना दुसरीकडे बहिणीने राजकारण न करण्याच आवाहन केलं आहे. त्यामुळे आत्महत्येमागे नेमकं कारण काय हे पोलीस तपासात पुढे येणार आहे.
