बार्सिलोना : अमेरिकेच्या तंत्रज्ञान विश्वातील उद्योजक आणि अँटीव्हायरस क्षेत्रातील गुरु तसंच मॅकॅफीचे संस्थापक जॉन मॅकॅफी हे स्पेनमधील तुरुंगात मृतावस्थेत आढळले. बार्सिलोनामधील एका तुरुंगात त्यांनी गळफास घेऊन आत्महत्या केली. त्यांनी केलेल्या आत्महत्येने तंत्रज्ञान क्षेत्रात एकच खळबळ उडाली आहे.

नऊ महिने तुरुंगात राहिल्याने ते निराश झाले होते, अशी माहिती त्यांचे वकील झेवियर विलाब्ला यांनी दिली. स्पेनमधील उच्च न्यायालयाने  नुकतीच जॉन मॅकॅफी यांच्या अमेरिकेला प्रत्यार्पण करण्याला मंजुरी दिली होती.

75 वर्षीय जॉन मॅकॅफी यांनी जगातील पहिले कमर्शिअल अँटी-व्हायरस सॉफ्टवेअर ‘मॅकॅफी’ बनवले होते. “जर मला अमेरिकेत दोषी ठरवले तर संपूर्ण आयुष्य तुरुंगात घालवावं लागेल,” असे  त्यांनी मागील महिन्यात कोर्टातील सुनावणीदरम्यान म्हटले होते. “स्पॅनिश कोर्टाला हा अन्याय दिसेल अशी मला आशा आहे. अमेरिका मला एका उदाहरणाप्रमाणे वापरु इच्छतो,” असे ते म्हणाले होते.

जॉन मॅकॅफी अनेक वर्षांपासून अमेरिकेच्या प्राधिकरणांपासून पळ काढत आहेत. काही काळ ते आपल्या यॉटवरही राहिले. मॅकॅफी यांच्यावर करचोरीचा आरोप आहे. टेनेसी आणि क्रिप्टोकरन्सी घोटाळ्यात न्यूयॉर्कमध्ये त्यांच्यावर गुन्हा दाखल झाला आहे.

मागील वर्षी 3 ऑक्टोबर रोजी जॉन मॅकॅफी यांना बार्सिलोना विमानतळावरुन ताब्यात घेण्यात आले होते. ब्रिटिश पासपोर्ट वापरुन ते इस्तांबूलला  जात होते. जॉन मॅकॅफी यांनी NASA, Xerox आणि लॉकहीड मार्टिन यांसारख्या कंपन्यांसाठी काम केले  होते. 1987 मध्ये त्यांनी जगातील पहिले कमर्शिअल अँटी-व्हायरस बनवले होते.

जॉन यांनी 2011 मध्ये आपली सॉफ्टवेअर कंपनी इन्टेलला विकली होती आणि आता ते या व्यवसायात नव्हते. मात्र, सॉफ्टवेअर प्रोग्रॅम आताही त्यांच्याच नावाने सुरु आहे. जगभरात सुमारे 50 कोटी यूजर या अँटी व्हायरसचा वापर करतात. जॉन मॅकॅफी यांनी 2019 मध्ये म्हटले होते  की ‘वैचारिक कारणां’मुळे त्यांनी आठ वर्षांपासून अमेरिकेला आयकर दिलेला नाही.