रांजणगाव गणपती – अवघ्या महाराष्ट्रभरामध्ये सध्या अल्पवयीन मुलींच्या लैंगिक शोषणाच्या घटना कानावर पडत असतानाच शिरूर तालुक्यातील कारेगाव येथेही जन्मदात्या पित्याने स्वत:च्या मुलीवर लैगिक अत्याचार केल्याची धक्कादायक घटना उघडकीस आल्याने एकच खळबळ उडाली आहे. शिरुर तालुक्यात कारेगाव येथे भाड्याने खोली घेऊन राहणाऱ्या एका 35 वर्षीय नराधम बापाने पोटच्या 11 वर्षीय मुलीवर वारंवार लैंगिक अत्याचार केले. हा दुर्दैवी प्रकार मुलीने आपल्या 13 वर्षीय मोठ्या भावाला सांगितल्यानंतर उघडकिस आला. त्यानंतर मुलीच्या आईच्या मैत्रीनीने हा प्रकार रांजणगाव एमआयडीसी पोलिसांना सांगितल्यानंतर पोलिसांनी तातडीने हालचाल करत नराधम बापाला अटक केली आहे. तसेच आरोपी विरुद्ध पोक्सोअंतर्गत तसेच बलात्काराचा गुन्हा दाखल केला आहे. रांजणगाव पोलिसांनी दिलेल्या माहितीनुसार, वशिम येथील एक कुटुंब कारेगाव येथे कुटुंबाचा उदरनिर्वाह करण्यासाठी आले होते. पिडीत मुलीचा बाप हा बाहेरख्याली असल्यामुळे त्याची पत्नी तीन वर्षांपुर्वी आपल्या दोन मुलांना टाकुन निघुन गेली. त्यानंतर बापाने काही दिवसांपुर्वी दुसऱ्या एका महिलेशी अनैतिक संबंध ठेवले. परंतु आठ दिवसांपुर्वी आरोपीच्या वागण्याला कंटाळून ती महिला निघुन गेली. त्यानंतर या नराधम बापाने स्वतःच्या पोटच्या अकरा वर्षीय मुलीसोबत वारंवार लैंगिक संबंध ठेवले. त्याच्या यातना सहन न झाल्याने मुलीने आपल्या १३ वर्षीय मोठ्या भावाला सांगितले. त्यानंतर त्याने शेजारील व्यक्तीच्या मोबाईलवरुन आपल्या सख्या आईला फोन करुन सगळी हकीगत सांगितली. त्यानंतर तिने कारेगाव येथील आपल्या मैत्रिणीला तातडीने फोन करुन घटनेची माहिती दिली. त्यानंतर तिच्या मैत्रिणीने लगेचच पीडित मुलीच्या घरी धाव घेतली आणि तिथली परिस्थिती पाहुन रांजणगाव पोलिसांशी संपर्क साधला. रांजणगाव पोलिसांनी आधी त्या पिडीत मुलीला ताब्यात घेऊन तिला वैद्यकीय उपचारासाठी आधी शिरुर आणि त्यानंतर पुणे येथील शासकीय रुग्णालयात नेले. पिडीत मुलीची प्रकृती सध्या स्थिर आहे. रांजणगाव पोलिसांनी नराधम बापाला पुणे येथील विशेष न्यायालयात हजर केले असता. न्यायालायने आरोपीला आठ दिवस पोलिस कोठडी सुनावली आहे. कारेगाव येथील घटनास्थळी शिरुरचे पोलिस उपविभागीय अधिकारी प्रशांत ढोले, पोलिस निरीक्षक महादेव वाघमोडे, पोलिस उपनिरीक्षक निळकंठ तिडके, महिला पोलिस उपनिरीक्षक माधुरी झेंडगे यांनी भेट दिली. तर सहायक फौजदार दत्तात्रय शिंदे, पोलिस हवालदार विलास आंबेकर, ब्रम्हा पोवार, अभिमान कोळेकर, महिला पोलिस हवालदार विद्या बनकर यांच्या पथकाने हि कारवाई केली असुन या घटनेचा पुढील अधिक तपास रांजणगाव एमआयडीसी पोलिस स्टेशनच्या पोलिस उपनिरीक्षक सविता काळे या करत आहेत.
