कराची : पाकिस्तानचा सुप्रसिद्ध क्रिकेट इतिहासकार, लेखक डॉ. नौमन नियाज यांनी माजी वेगवान गोलंदाज शोएब अख्तरला बदनामी केल्याचा आरोप करत नोटीस पाठवली आहे. पीटीव्हीचे माजी क्रीडा संचालक डॉ. नियाज यांनी त्यांच्या वकिलामार्फत ही नोटीस पाठवली आहे. पाकिस्तान संघासोबत असताना अख्तर यांनी त्यांचे वर्णन ‘किट मॅन’ असे केले होते. शोएब अख्तरने एका पॉडकास्टवर बोलताना डॉ. नियाज मुळात संघात आमच्यासाठी बॅग आणि सामान घेऊन जायचे, असे म्हटले होते. अख्तर जेव्हा पाकिस्तान संघाकडून खेळत असे तेव्हा काही दौऱ्यांवर डॉ. नियाज यांनी पाकिस्तान संघासाठी डेटा विश्लेषक म्हणून काम केले. अख्तरने संघातील प्रशिक्षक आणि व्यवस्थापकांच्या भूमिकेवर टीका केली आणि खेळाडूंच्या बॅग घेऊन जाण्यासाठी डॉ. नियाज संघात कसे होते ते सांगितले. या नोटीसमध्ये, डॉ. नियाजच्या वकिलाने त्यांना १४ दिवसांच्या आत बिनशर्त माफी मागण्यास सांगितले आहे. जर त्याने तसे केले नाही तर त्याला कायदेशीर कारवाई आणि नुकसानभरपाईला सामोरे जावे लागेल. या दोघांमध्ये यापूर्वीही वाद झाला आहे. इम्रान खानच्या सरकारच्या काळात, डॉ. नियाजने किरकोळ वादानंतर अख्तरला पीटीव्हीवरील लाईव्ह शो सोडण्यास सांगितले होते. नंतर एका मंत्र्यांच्या हस्तक्षेपानंतर, त्याने वेगवान गोलंदाजाची माफी मागितली आणि दोघांनीही वाद मिटवला.
