Shivsena hearing :  शिवसेना पक्षाची अधिकृत मान्यता, धनुष्यबाण चिन्हावरील दावा आणि शिंदे गटाच्या आमदारांच्या अपात्रतेशी संबंधित महत्त्वाच्या प्रकरणाची सर्वोच्च न्यायालयातील सुनावणी आज मंगळवारी होऊ शकली नाही. वरिष्ठ वकील कपिल सिब्बल यांनी तयारीसाठी वेळ मागितल्याने न्यायालयाने ही सुनावणी उद्या बुधवारी (दि. 5) घेण्याचे निश्चित केले.

हे प्रकरण सरन्यायाधीश सूर्यकांत, न्यायमूर्ती जॉयमाल्या बागची आणि न्यायमूर्ती व्ही. मोहन यांच्या खंडपीठासमोर आले होते. सुनावणीदरम्यान कपिल सिब्बल यांनी न्यायालयाकडे तयारीसाठी काहीसा अवधी देण्याची विनंती केली. तसेच शक्य असल्यास बुधवारी दुपारी २ वाजता प्रकरण प्राधान्याने घेण्याची मागणीही त्यांनी केली.

यावर सरन्यायाधीश सूर्यकांत यांनी, इतर प्रलंबित प्रकरणांचा विचार करणे आवश्यक असल्याचे स्पष्ट केले. त्यानंतर सिब्बल यांनी “उद्या थोडा वेळ द्या, अन्यथा प्रत्येक वेळी आमचे नशीब साथ देत नाही,” असे म्हणत पुन्हा सुनावणी पुढे ढकलण्याची विनंती केली. अखेरीस न्यायालयाने हे प्रकरण बुधवारी सुनावणीसाठी निश्चित केले.

नेमके प्रकरण काय?  (Shivsena hearing)

उद्धव ठाकरे यांनी भारत निवडणूक आयोगाने एकनाथ शिंदे यांच्या गटाला अधिकृत शिवसेना म्हणून दिलेल्या मान्यतेला सर्वोच्च न्यायालयात आव्हान दिले आहे. शिवसेना पक्षाचे नाव आणि धनुष्यबाण हे निवडणूक चिन्ह शिंदे गटाला देण्याच्या आयोगाच्या निर्णयाविरोधात ही याचिका दाखल करण्यात आली आहे.

 

याचबरोबर शिवसेनेचे नेते सुनील प्रभू यांनीही स्वतंत्र याचिका दाखल केली आहे. महाराष्ट्र विधानसभा अध्यक्षांनी शिंदे गटातील आमदारांना अपात्र ठरविण्यास नकार दिलेल्या निर्णयाला त्यांनी सर्वोच्च न्यायालयात आव्हान दिले असून, या दोन्ही याचिका सुनावणीसाठी सूचीबद्ध आहेत.

उद्याच्या सुनावणीकडे राजकीय वर्तुळाचे लक्ष   ( Shivsena hearing)

शिवसेना पक्षाची अधिकृत मान्यता, धनुष्यबाण चिन्हावरील हक्क आणि शिंदे गटाच्या आमदारांच्या अपात्रतेचा प्रश्न या प्रकरणाशी थेट संबंधित असल्याने बुधवारी होणारी सुनावणी महाराष्ट्राच्या राजकारणासाठी महत्त्वाची मानली जात आहे. सर्वोच्च न्यायालय या संवेदनशील प्रकरणात कोणते निर्देश देते आणि पुढील सुनावणीची दिशा काय ठरते, याकडे राज्यातील राजकीय पक्षांसह सर्वांचे लक्ष लागले आहे.