Shivsena Hearing : शिवसेनेतील फुटीनंतर निवडणूक आयोगाने दिलेल्या निकालानुसार अधिकृत शिवसेना पक्ष आणि चिन्ह एकनाथ शिंदे यांच्याकडे आहे. यावर आक्षेप घेत उद्धव ठाकरे गटाने या निर्णयाला सर्वोच्च न्यायालयात आव्हान दिले आहे.

निवडणूक आयोग आणि महाराष्ट्र विधानसभा अध्यक्षांच्या निर्णयाविरोधात आव्हान देणाऱ्या याचिकांवर सर्वोच्च न्यायालयात सुनावणी सुरु आहे. या प्रकरणाची सुनावणी सरन्यायाधीश (CJI) सूर्यकांत, न्यायमूर्ती बागची आणि न्यायमूर्ती व्ही. मोहना यांच्या न्यायपीठासमोर होत आहे.

बुधवारी ठाकरे गटाचे ज्येष्ठ वकील कपिल सिब्बल यांनी न्यायालयात संपूर्ण घटनाक्रम मांडत शिंदे गटाच्या भूमिकेवर गंभीर आक्षेप घेतले. निवडणूक आयोगाने फक्त विधिमंडळ पक्ष संख्येच्या आधारावर निर्णय दिला. यावर कपिल सिब्बल यांनी कोर्टात बाजू मांडताना म्हटलं की, “विधीमंडळ पक्ष हा राजकीय पक्षाचा भाग आहे. तो म्हणजे मूळ राजकीय पक्ष नाही, पक्षाची घटना योग्य आहे की नाही हे ठरवण्याचा अधिकार निवडणूक आयोगचा नाही”. या प्रकरणाची पुढील सुनावणी आज गुरुवारी दुपारी २ वाजता होणार आहे.

बुधवारीच्या सुनावणीत ठाकरे गटाचा काय दावा होता?   (Shivsena Hearing)

कपिल सिब्बल यांनी न्यायालयात सांगितले की, शिवसेना हा निवडणूक आयोगाकडे नोंदणीकृत राजकीय पक्ष असून पक्षाची घटना आणि पक्षप्रमुखांचे अधिकार याबाबत कधीही वाद नव्हता. उद्धव ठाकरे यांनीच एकनाथ शिंदे यांची गटनेते आणि सुनील प्रभू यांची प्रतोद म्हणून नियुक्ती केली होती. २०२२ मध्ये काही आमदारांनी क्रॉस व्होटिंग केल्यानंतर बंडखोर आमदार सुरत आणि नंतर गुवाहाटीला गेले. त्यानंतर उद्धव ठाकरे यांनी शिंदे यांना गटनेतेपदावरून हटवून अजय चौधरी यांची नियुक्ती केली, असा घटनाक्रम सिब्बल यांनी न्यायालयासमोर मांडला.

 

त्यांनी असा युक्तिवादही केला की, विधिमंडळ पक्षातील बहुमत म्हणजे मूळ राजकीय पक्षाचे बहुमत होत नाही. पक्षाच्या घटनेनुसार गटनेते आणि प्रतोद बदलण्याचे अधिकार केवळ पक्षप्रमुखांकडेच असतात. त्यामुळे बंडखोर आमदारांनी केलेले निर्णय आणि त्यांना विधानसभा अध्यक्षांनी दिलेली मान्यता कायदेशीरदृष्ट्या चुकीची असल्याचा दावा त्यांनी केला.

न्यायालयात महत्त्वाचे प्रश्न   (Shivsena Hearing)

सुनावणीदरम्यान न्यायमूर्ती जोयमाल्या बागची यांनी निवडणूक चिन्ह हे राजकीय पक्षाचे की विधिमंडळ पक्षाचे, असा महत्त्वाचा प्रश्न उपस्थित केला. त्यावर कपिल सिब्बल यांनी निवडणूक आयोग चिन्ह हे राजकीय पक्षालाच देतो, त्यामुळे चिन्हावर दावा हा मूळ पक्षाचाच असतो, असे स्पष्ट केले. सरन्यायाधीशांनीही पक्षातील बहुमत कसे निश्चित करायचे, याबाबत स्पष्ट निकष आहेत का, असा प्रश्न उपस्थित केला. यावर सिब्बल यांनी पक्षाची घटनाच त्याचे उत्तर देते, असा युक्तिवाद केला.

दरम्यान, आजच्या सुनावणीतही शिवसेना ठाकरे गटाच्या वतीने कपिल सिब्बल हेच यावेळी पुन्हा युक्तिवाद करणार आहेत. शिवसेना ठाकरे गटाच्या वतीने आणखी एक वकील युक्तिवाद करणार आहेत. त्यानंतर शिंदे शिवसेनेच्या वतीने मेहता आणि कौल हे युक्तिवाद करतील, त्यानंतर याच्या संदर्भातील निर्णय होईल. कपिल सिब्बल यांनी जो काही युक्तिवाद केला, त्या युक्तिवादाला शिंदे गटाचे वकील प्रत्युत्तर देतील. त्यानंतर यावर सर्वोच्च न्यायालय काय भूमिका घेणार याकडे राज्याच्या राजकीय वर्तुळाचे लक्ष लागले आहे.

हेही वाचा: 

Bombay High Court: मोठा निकाल! तरुण तेजपाल दोषी ; मुंबई उच्च न्यायालयाच्या निर्णयाने खळबळ