हिंगोली (प्रतिनिधी शिवशंकर निरगुडे) – हिंगोली येथे शिवसेना पदाधिकारी व कार्यकर्त्यांच्या मेळाव्यात १ ऑगस्ट रोजी हिंगोली जिल्हा संपर्क प्रमुख बबनराव थोरात यांनी गद्दारांची वाहने फोडल्यास त्यांचा पक्षप्रमुख उध्दव ठाकरे यांच्या हस्ते सन्मान केला जाईल असे चिथावणीखोर वक्तव्य केले होते. या प्रकरणात शांतता भंग करण्याचा प्रयत्न केल्याच्या आरोपावरून त्यांच्यावर हिंगोली शहर पोलिस ठाण्यात मंगळवारी गुन्हा दाखल झाला आहे. हिंगोली शहरातील महावीर भवन येथे आयोजित शिवसेना कार्यकर्त्यांच्या मेळाव्यात त्यांनी ते वक्तव्य केले होते.

पुणे येथे आमदार उदय सामंत यांच्या वाहनावर झालेल्या हल्ला प्रकरणात शिवसेनेचे हिंगोली जिल्हा संपर्क प्रमुख बबनराव थोरात यांना पुणे पोलिसांनी बुधवारी (ता. ३) पहाटे साडेपाच वाजता मुंबईतील काळाचौकी पोलिस ठाण्यातून ताब्यात घेतले आहे. याशिवाय सामंतांच्या वाहनावरील हल्ला प्रकरणी सहा जणांना पुणे पोलिसांनी अटक केली. तत्पुर्वी थोरात यांना पुणे येथे नेण्यात आले आहे. तर, दुसरीकडे पोलिसांची ही कारवाई सुडबुध्दीने सुरु असल्याचा आरोप थोरात यांनी केला आहे.

पुणे येथे मंगळवारी सायंकाळी आमदार उदय सामंत यांच्या वाहनावर शिवसैनिकांनी हल्ला केल्याची घटना घडली आहे.या घटनेला बबनराव थोरात यांना जबाबदार धरले जात आहे. त्यांना मंगळवारी मध्यरात्री दीड वाजण्याच्या सुमारास मुंबई येथील काळाचौकी पोलिस ठाण्यात चौकशीसाठी बोलावण्यात आले. त्यानंतर त्यांना तेथेच थांबवून त्यांची चौकशी करण्यात आली. तर आज पहाटे साडेपाच वाजता पुणे येथील भारती विद्यापीठ पोलिस ठाण्याच्या पथकाने काळाचौकी पोलिस ठाण्यात येऊन त्यांना ताब्यात घेतले आहे. पोलिस त्यांना घेऊन पुण्याकडे रवाना झाले आहेत.

पुणे येथे आमदार उदय सामंत यांच्या वाहनावर हल्ला झाला त्यावेळी आपण मुंबईत होतो. या प्रकरणात आपला कुठल्याही प्रकारचा संबंध नसतांना पोलिसांनी आपल्याला चौकशीसाठी ताब्यात घेतले आहे.आता पोलिस काय चौकशी करणार हे पहावे लागणार आहे. तर पोलिसांची ही कारवाई सुडबुध्दीची आहे, असं थोरात यांनी म्हटलं.

शिवसेनेच्या बळावर आमदार झालेल्यांनीच पाठीत खंजीर खुपसला आहे. आता यांना रोखण्यासाठी आपल्याला गावा गावात उभे रहावे लागणार आहे. प्रत्येकाने आता पासूनच कामाला लागावे. शिवसेनेच्या हिंगोली जिल्हा प्रमुख पदासाठी इच्छुक असलेल्यांनी त्यांच्या गावात गद्दारांच्या गाड्या आल्यास फोडण्याचे आवाहन करून गाड्या फोडणाऱ्यांचा मातोश्रीवर शिवसेना पक्ष प्रमुख उध्दव ठाकरे यांच्या हस्ते सन्मान केला जाणार असल्याचे विधान त्यांनी केलं होतं.