Shirur: शिरूर तालुक्यातील कवठे येमाई येथे ३ एप्रिल रोजी घडलेल्या एका घटनेने गुंतागुंतीचे वळण घेतले असून, त्याच घटनेतून मारहाण आणि विनयभंगाच्या परस्परविरोधी तक्रारी समोर आल्याने प्रकरण चिघळले आहे. या विरोधाभासी दाव्यांमुळे पोलिसांसमोर नेमका घटनाक्रम उलगडण्याचे आव्हान निर्माण झाले आहे. प्राथमिक माहितीनुसार, किरकोळ कारणावरून वादाला सुरुवात झाली. तक्रारदार शरीफ उस्मान पिंजारी (वय ३३) यांच्या फिर्यादीनुसार, सुदाम इचके, शुभम इचके, भाऊ इचके, कैलास बच्चे व केतन माटे या पाच जणांनी दुपारी सुमारे १ वाजण्याच्या सुमारास त्यांच्या घरात जबरदस्तीने प्रवेश केला. पाणी मागण्याच्या कारणावरून वाद वाढत जाऊन मारहाणीपर्यंत पोहोचल्याचा आरोप आहे. लोखंडी पाईप, लाकडी काठ्या व बेल्टने मारहाण केल्याने पिंजारी यांचा डावा पाय फ्रॅक्चर झाला असून त्यांच्यावर ससून रुग्णालयात उपचार सुरू आहेत. दरम्यान, याच घटनेबाबत दुसऱ्या बाजूने वेगळाच दावा करण्यात आला आहे. संबंधित गटातील एका विवाहित महिलेने दिलेल्या फिर्यादीनुसार, मारहाणीपूर्वी पिंजारी हे दारूच्या नशेत तिच्या घरात घुसले होते. त्यांनी तिचा हात पकडून धमकी दिली, ओढणी ओढून अश्लील वर्तन करत विनयभंग केल्याचा आरोप महिलेने केला आहे. तिच्या आरडाओरडीनंतर नातेवाईक घटनास्थळी धावून आले आणि त्यानंतर वाद वाढून मारहाण झाली, अशी शक्यता व्यक्त करण्यात येत आहे. या पार्श्वभूमीवर ही घटना एकाच वादातून उफाळलेला संघर्ष असल्याचे स्पष्ट होत असून, एका बाजूला गंभीर मारहाण तर दुसऱ्या बाजूला विनयभंगाचे आरोप असल्याने प्रकरण अधिक संवेदनशील बनले आहे. दोन्ही बाजूंनी शिरूर पोलीस ठाण्यात परस्परविरोधी गुन्हे दाखल करण्यात आले आहेत. भारतीय न्याय संहितेच्या विविध कलमान्वये तपास सुरू असून, पोलीस निरीक्षक संदेश केंजळे यांच्या मार्गदर्शनाखाली पथक दोन्ही तक्रारींची सांगड घालत घटनाक्रम स्पष्ट करण्याचा प्रयत्न करत आहे. वैद्यकीय अहवाल, साक्षीदारांचे जबाब आणि घटनास्थळावरील पुरावे यांच्या आधारे सत्य उघड करण्याचे काम सुरू आहे. दरम्यान, या घटनेमुळे कवठे येमाई परिसरात तणावाचे वातावरण निर्माण झाले असून नागरिकांमध्ये भीती व संभ्रम पसरला आहे.
