प्रभात वृत्तसेवा शिक्रापूर – बुरुंजवाडी (ता. शिरूर) येथे ऊसतोड सुरू असताना कामगारांना तीन बिबटसदृश प्राण्याची पिल्ले आढळून आल्याने परिसरात खळबळ उडाली. मात्र, ऊसाच्या फडात आढळलेली पिल्ले दुर्मिळ वाघाटी मांजराची असल्याचे नंतर निष्पन्न झाले आहे.माजी सरपंच विलास नळकांडे यांच्या शेतात ऊसतोड सुरू असताना कामगारांना ही तीन पिल्ले दिसली. बिबट्याच्या पिल्लांच्या भीतीने कामगारांनी काम बंद केले. याबाबत माहिती मिळताच निसर्ग वन्यजीव सामाजिक संस्थेचे अध्यक्ष व वनविभाग वन्यजीव बचाव पथकाचे शेरखान शेख यांनी घटनास्थळी धाव घेत माजी सरपंच नळकांडे, व्यंकटेश कृपा शुगर मिल्स कारखान्याचे सुनील कदम यांच्या उपस्थितीत पाहणी केली असता, ही वाघाटी मांजराची पिल्ले असल्याचे स्पष्ट झाले. शेरखान शेख यांनी उपस्थितांना योग्य माहिती देत या पिल्लांना त्यांच्या आईशी पुनर्मिलन करण्यासाठी व्यवस्थितपणे त्या शेतात ठेवले. त्यानंतर काही वेळातच वाघाटी मांजर शेतात येऊन ऊसतोड कामगार व शेतकऱ्यांसमक्ष पिलांना घेऊन गेली.
