Shirur News : सेंट जोसेफ इंटरनॅशनल इंग्लिश मीडियम स्कूल (शिरूर) च्या विद्यार्थ्यांनी (Shirur News) महाराष्ट्रातील आदर्श ग्राम म्हणून देशभर प्रसिद्ध असलेल्या हिवरे बाजार गावाला अभ्यासात्मक भेट दिली. या भेटीदरम्यान विद्यार्थ्यांनी ग्रामीण विकास, जलसंधारण आणि लोकसहभागातून झालेल्या सामाजिक परिवर्तनाचा प्रत्यक्ष अनुभव घेतला.

पद्मश्री पोपटराव पवार यांचे विद्यार्थ्यांना मार्गदर्शन
हिवरे बाजारच्या सार्वजनिक वाचनालय परिसरात आयोजित मार्गदर्शन कार्यक्रमात गावाचे शिल्पकार पद्मश्री पोपटराव पवार यांनी विद्यार्थ्यांशी संवाद साधला. एकेकाळी दुष्काळ, बेरोजगारी आणि स्थलांतराने ग्रासलेल्या गावाने लोकसहभाग, पाणलोट विकास, वृक्षलागवड, जलसंधारण आणि पारदर्शक प्रशासनाच्या जोरावर देशात आदर्श कसा निर्माण केला, याचा संपूर्ण प्रवास त्यांनी उलगडून सांगितला.

विद्यार्थ्यांना मार्गदर्शन (Shirur News) करताना ते म्हणाले, “मोठी स्वप्ने पाहा आणि ती पूर्ण करण्यासाठी सातत्याने मेहनत घ्या. शिक्षण हे आयुष्य बदलण्याचे सर्वात प्रभावी साधन आहे. समाजासाठी काहीतरी करण्याची जिद्द प्रत्येकात असली पाहिजे; कारण एक चांगला नागरिक बनणे हीच खरी राष्ट्रसेवा आहे.”

जिज्ञासू प्रश्नांना संयमी उत्तरे
संवाद सत्रादरम्यान विद्यार्थ्यांनी विविध विषयांवर विचारलेल्या प्रश्नांना पोपटराव पवार यांनी संयमाने उत्तरे देत मुलांचे शंकानिरसन केले. त्यांच्या या प्रेरणादायी विचारांमुळे विद्यार्थ्यांमध्ये आत्मविश्वास, सकारात्मकता आणि सामाजिक जबाबदारीची जाणीव निर्माण झाली.

जलसंधारण व ग्रामविकासाची प्रत्यक्ष पाहणी
या शैक्षणिक सहलीदरम्यान विद्यार्थ्यांनी हिवरे बाजारमधील जलसंधारण प्रकल्प, स्वच्छता व्यवस्था, ग्रामविकासाची विविध कामे, सार्वजनिक सुविधा आणि ग्रामस्थांचा सक्रिय लोकसहभाग प्रत्यक्ष पाहून समजून घेतला. यामुळे विद्यार्थ्यांना पाठ्यपुस्तकातील संकल्पनांच्या पलीकडे जाऊन प्रत्यक्ष अनुभवातून शिकण्याची संधी मिळाली.

व्यक्तिमत्त्व विकासाला चालना
अशा अभ्यासू सहलींमुळे विद्यार्थ्यांच्या व्यक्तिमत्त्व विकासाला चालना मिळते, सामाजिक जाणीव प्रगल्भ होते आणि आदर्श व्यक्तींकडून प्रेरणा घेता येते, असा विश्वास शाळेच्या मुख्याध्यापिका नॅन्सी पायस यांनी व्यक्त केला.

या प्रसंगी (Shirur News) शाळेचे संस्थापक अनिल पायस, शिक्षक सुनिल भुकन, अभिषेक जाधव, संदिप पवार, मतायस डिक्रुज, प्रिया राणे, नैना चोबे, सोनिया डिसुजा, रजिना डिमेलो, सुरेश चौगुले यांच्यासह शिक्षकेतर कर्मचारी, हिवरे बाजारचे ग्रामस्थ व नागरिक उपस्थित होते. विद्यार्थ्यांनी पद्मश्री पोपटराव पवार यांच्या मार्गदर्शनाबद्दल कृतज्ञता व्यक्त करत हा अनुभव आयुष्यभर स्मरणात राहील, अशी भावना व्यक्त केली.