प्रभात वृत्तसेवा शिरूर – बहुचर्चित शिरूर नगरपरिषद निवडणुकीत मतदारांनी त्रिशंकू कौल दिल्यानंतर आता सत्तास्थापना, उपनगराध्यक्षपद आणि विषय समित्यांच्या निवडीसाठी राजकीय घडामोडींनी वेग घेतला आहे. कोणत्याही एका पक्षाला स्पष्ट बहुमत नसल्याने प्रत्येक नगरसेवकाला महत्त्व प्राप्त झाले असून, विविध पक्षांच्या नेत्यांमध्ये गुप्त बैठकांचे सत्र सुरू झाले आहे. विजयी नगरसेवकांकडून महत्त्वाची पदे मिळवण्यासाठी आतापासूनच फिल्डिंग लावली जात आहे. या निवडणुकीत भाजपने सर्वाधिक ११ जागा मिळवत आपले वर्चस्व राखण्याचा प्रयत्न केला आहे. राष्ट्रवादी काँग्रेस यांनी नगराध्यक्षपदासह ७ जागांवर विजय मिळवला आहे, तर राष्ट्रवादी काँग्रेस (शरद पवार गट) ५ जागांसह तिसऱ्या क्रमांकावर असून एक अपक्ष उमेदवार विजयी झाला आहे. सद्यस्थितीत राष्ट्रवादी (शरद पवार गट) किंगमेकर ठरणार का? याकडे सर्वांचे लक्ष लागले आहे. राष्ट्रवादी (शरद पवार) पक्षाचे शहराध्यक्ष रवी ढोबळे यांनी अजित पवार गटासोबत जाण्याचे संकेत दिले असले, तरी माजी आमदार अशोक पवार यांनी अंतिम निर्णय वरिष्ठांशी चर्चा करूनच घेतला जाईल, असे स्पष्ट केले आहे.दुसरीकडे, भाजपचे शहराध्यक्ष नितीन पाचर्णे यांनीही सत्तास्थापनेचा दावा केला असून भाजप आणि राष्ट्रवादीत (शप) गुप्त चर्चा झाल्याची चर्चा राजकीय वर्तुळात रंगली आहे. निवडणुकीपूर्वी महायुती एकत्र लढण्याची शक्यता होती, मात्र ऐनवेळी भाजप आणि अजित पवार गटाने स्वतंत्र पॅनेल उभे केल्याने समीकरणे बदलली आहेत. उपनगराध्यक्षपदासाठी जातीय समीकरणे महत्त्वाची ठरणार असून, बहुजन समाजातील नगरसेवकाला संधी मिळण्याची शक्यता वर्तवली जात आहे. स्पष्ट बहुमताअभावी राजकीय घोडेबाजार रंगण्याची भीतीही नागरिकांमधून व्यक्त होत आहे. स्वीकृत नगरसेवक पदासाठीही फिल्डिंग शिरूर नगरपरिषदेत तीन स्वीकृत नगरसेवक घेण्याची तरतूद असल्याने, प्रत्येक पक्षाकडून आपल्या एका सदस्याला या पदावर संधी मिळावी यासाठी प्रयत्न सुरू झाले आहेत. यासाठी इच्छुकांनी मोर्चेबांधणी सुरू केली असून, प्रत्यक्ष सत्ता कुणाच्या हाती जाते? हे पाहणे औत्सुक्याचे ठरेल.
