Shirur Crime News : शरदवाडी, जांबूत (ता. शिरूर) येथे भरदुपारी घरात प्रवेश करून ८५ वर्षीय वृद्ध महिलेचे दागिने चोरीप्रकरणी पोलिसांनी तपासाची चक्रे फिरवत तिसऱ्या दिवशीच आजीच्या पणतुला जेरबंद करत दागिन्याचा ऐवज हस्तगत केला. जांबूत (ता. शिरूर) येथील आकाश किसन मेरगळ याच्यावर गुन्हा दाखल करण्यात आला आहे. याप्रकरणी सहायक पोलीस निरीक्षक दिपक कारंडे यांनी दिलेल्या माहितीनुसार शुक्रवार (दि. २०) रोजी शरदवाडी येथे दुपारच्या वेळी वृद्ध महिला लहानुबाई सखाराम सरोदे या घरात होत्या. यावेळी त्यांचे घरातील त्यांचा मुलगा, सुनबाई व इतर साखरपुडा कार्यक्रमासाठी बाहेर गेल्याची माहिती घेत त्यांचा पणतु आकाश मेरगळ यांनी घरात प्रवेश करून आजीचे नऊ लाख रुपये किमतीचे साडेसहा तोळे लुबाडून पोबारा केला होता. या घटनेने परिसरातील महिलांमध्ये भीतीचे वातावरण निर्माण होऊन महिलांच्या सुरक्षिततेचा प्रश्न ऐरणीवर आला होता. या घटनेची दखल घेत शिरूर विभागाचे उपविभागीय पोलीस अधिकारी प्रशांत ढोले, शिरूरचे पोलीस निरीक्षक संदेश केंजळे यांच्या मार्गदर्शनाखाली टाकळी हाजी पोलीस दूरक्षेत्राचे सहायक पोलीस निरीक्षक दिपक करंडे, पोलीस उपनिरीक्षक दिलीप पवार, गुन्हे शाखेचे एस. ए. चव्हाण, पोलिस कॉन्टेबल विजय शिंदे यांचेसह काही पोलीस कर्मचाऱ्यांनी तपासाल वेग देत घटनेची माहिती घेत पिडीत आजीचे पणतू आकाश मेरगळ याला अटक केले. त्याचेकडून दागिने हस्तगत केले असून घटनेचा पुढील तपास सहायक पोलीस निरीक्षक दिपक कारंडे करत आहेत.
