Shirur Accident – शिरूर पोलिस स्टेशन हद्दीत गोलेगाव रोड परिसरातील घोडोबा मंदिराच्या पाठीमागे सुरू असलेल्या अंतर्गत रस्त्याच्या कामादरम्यान सिमेंट मिक्सरचे चाक अंगावरून गेल्याने मजुराचा जागीच मृत्यू झाला. बांधकाम क्षेत्रात काम करणाऱ्या मजुरांच्या सुरक्षेचा प्रश्न पुन्हा ऐरणीवर आला आहे. ही घटना बुधवारी (दि.13) रोजी सायंकाळी घडली. शिरूर पोलीस ठाण्यात अकस्मात मृत्यूची नोंद केली आहे. सचिन अंकुश कुरणे (वय 25), असे मृत्यू झालेल्या तरूणाचे नाव आहे. कुरणे हा मूळचा कर्नाटकातील थील रहिवासी आहे. तो शिरूर येथे रोजगारासाठी आला होता. याबाबत विजय प्रेमसिंग गुजर (वय 28, गुजरमळा, शिरूर) यांनी पोलिसांना माहिती दिली. पोलिसांनी दिलेल्या माहितीनुसार, सायंकाळी अंतर्गत सिमेंट रस्त्याचे काम सुरू होते. यावेळी विजय गुजर, हर्षल पांचगे, इतर मजूर सिमेंटच्या गोण्यांची मोजणी करीत होते. दरम्यान, सचिन कुरणे हा थोड्या अंतरावर जाऊन अंगावर प्लास्टिकचा कागद घेऊन काम सुरू असलेल्या रस्त्यातच झोपला होता. याच वेळी कामाच्या ठिकाणी सिमेंट मिक्सर वाहन चालक अभिषेक परमल जाटाव याने वाहन पाठीमागे घेत असताना त्याला सचिन झोपलेला असल्याचे लक्षात आले नाही. परिणामी मिक्सरचे चाक थेट सचिनच्या डोक्यावरून गेले. यात तो गंभीर जखमी झाला. मोठ्या प्रमाणात रक्तस्त्राव झाल्याने सहकाऱ्यांनी त्याला शिरूर येथील शासकीय रुग्णालयात दाखल केले. मात्र डॉक्टरांनी उपचारापूर्वीच त्याचा मृत्यू झाल्याचे घोषित केले. पुढील तपास पोलीस उपनिरीक्षक राहुल भागवत करीत आहेत.
