मुंबईः काल दिल्लीत देशाचे माजी केंद्रीय कृषी मंत्री शरद पवार यांच्या हस्ते राज्याचे उपमुख्यमंत्री एकनाथ शिंदे यांना महादजी शिंदे राष्ट्र गौरव पुरस्कार देऊन त्यांचा सन्मान करण्यात आला. मात्र, शिंदेंचा शरद पवार यांनी केलेला गौरव आणि त्यांच्यावर केलेले स्तुतीसुमने यावर उबाठा गटाचे संजय राऊत यांनी शरद पवारांना खडेबोल सुनावले आहेत.

ऐरवी शरद पवार यांच्याबद्दल स्तुतीसुमने करणारे राऊत आज शरद पवारांबद्दल कमालीचे आक्रमक दिसले. राऊत यांनी पत्रकार परिषद घेत यावर आपली तीव्र स्वरुपात नाराजी व्यक्त केली. ज्यांनी महाराष्ट्राची वाट लावली त्यांच्यासोबत खुलेआम बसणे आणि त्यांचा सन्मान आपल्या हातून करणे योग्य नसल्याचे राऊत म्हणाले. तसेच त्यांच्या कार्यक्रमाला शरद पवारांनी जायला नव्हते पाहिजे अशी भावना देखील यावेळी बोलताना राऊत यांनी व्यक्त केली.

शिंदेंचा नाही, तर अमित शहांचा सत्कार

देशाचे जेष्ठ नेते शरद पवार यांनी राज्याचे उपमुख्यमंत्री एकनाथ शिंदे यांचा सत्कार केल्याने आता महाविकास आघा़डीत मिठाचा खडा पडला आहे. या सत्काराबद्दल राऊत यांनी संताप व्यक्त करत शरद पवारांनी शिंदेंचा नाही तर अमित शहांचा सत्कार केला अशी बोचरी टीका शरद पवार यांच्यावर केली. आम्हाला दिल्लीतलं राजकारण माहिती नाही पण आम्हालाही राजकारण कळतं पवारसाहेब अशी खोचक शब्दांत राऊतांनी आपली भावना व्यक्त केली.

काही गोष्टी राजकारणात टाळायच्या असतात

आम्हाला दिल्लीतलं राजकारण माहिती नाही आणि कळत नाही. पण आम्हालाही राजकारण कळतं पवारसाहेब. काही गोष्टी राजकारणात टाळायच्या असतात. महाराष्ट्राचे तुकडे पाडणाऱ्या, उद्योग पळवून नेणाऱ्या अमित शहांचा सत्कार आहे हा. शिंदे हे अमित शहांचे प्रतिक आहेत. महाराष्ट्र कमजोर केला त्यांना सन्मानित का करता? असा सवाल संजय राऊत यांनी उपस्थित केला.

शरद पवारांनी केलं शिंदेंच कौतुक

दिल्लीत झालेल्या कार्यक्रमात माजी केंद्रीय कृषी मंत्री शरद पवारांनी उपमुख्यमंत्री एकनाथ शिंदेंचे कौतुक केले. एकनाथ शिंदे यांनी ठाणे महापालिका, नवी मुंबई महापालिका आणि राज्याचे मुख्यमंत्री म्हणून त्यांनी योग्य दिशा देण्याचं काम केलं अशा शब्दात शरद पवार यांनी त्यांचे कौतुक केले होते.