shilpa shirodkar: बॉलीवूडमधील लोकप्रिय अभिनेत्री शिल्पा शिरोडकर पुन्हा एकदा चर्चेत आली आहे. दीर्घ ब्रेकनंतर ती ‘जटाधरा’ या चित्रपटातून मोठ्या पडद्यावर पुनरागमन करणार आहे. या निमित्तानं दिलेल्या एका मुलाखतीत शिल्पानं तिच्या भाऊजी आणि दक्षिणेतील सुपरस्टार महेश बाबू यांच्याबद्दल मनमोकळं बोलताना त्याचं भरभरून कौतुक केलं आहे. शिल्पा म्हणाली, “तो माझ्या कुटुंबासारखाच आहे आणि मी आजवर भेटलेल्या सर्वात चांगल्या माणसांपैकी एक आहे. एक अभिनेत्री म्हणून मी त्याची फॅन आहे. तो माझा भाऊजी आहे आणि खरं सांगायचं झालं तर, तो असा माणूस आहे ज्याला नेहमी इतरांचं भलं व्हावं असंच वाटतं. त्याला कुणाचा हेवा वाटत नाही, कुणाचं वाईट व्हावं असंही वाटत नाही. तो जसा दिसतो, तसाच आहे साधा, नम्र आणि मनमिळाऊ.” शिल्पा सोशल मीडियावरही खूप सक्रिय असते. ती अनेकदा महेश बाबू आणि तिची बहीण नम्रता शिरोडकर यांच्यासोबतचे फोटो शेअर करत चाहत्यांशी संवाद साधते. जेव्हा तिला विचारण्यात आलं की ती भाऊजी महेश बाबूबरोबर एखाद्या चित्रपटात काम करेल का, तेव्हा ती हसत म्हणाली, “नाही, मी अजून असा विचार केला नाहीये. पण जर या चित्रपटाला चांगला प्रतिसाद मिळाला, तर कदाचित भविष्यात काहीतरी होऊ शकेल. अजून त्याच्याशी या विषयावर बोललेली नाही.” शिल्पा लवकरच वेंकट कल्याण आणि अभिषेक जैस्वाल दिग्दर्शित ‘जटाधरा’ या चित्रपटात ‘शोभा’ या महत्त्वाच्या भूमिकेत दिसणार आहे. या चित्रपटात सोनाक्षी सिन्हा मुख्य भूमिकेत असून, हा चित्रपट ७ नोव्हेंबरला तेलुगू आणि हिंदी भाषेत प्रदर्शित होणार आहे. हा चित्रपट शिल्पासाठी विशेष आहे, कारण त्याद्वारे ती पुन्हा एकदा मोठ्या पडद्यावर पुनरागमन करत आहे.
