मुंबई : शिवसेनेतील २०२२ च्या उभ्या फुटीपासून एकनाथ शिंदे यांच्या सोबत असलेल्या दहीसरच्या माजी नगरसेविका शितल म्हात्रे यांनी महापालिका निवडणुकीतून माघार घेण्याचा निर्णय घेतला आहे. राज्य निवडणूक आयोगाने २ डिसेंबरला नगरपालिका व नगरपरिषद निवडणुकांचा कार्यक्रम जाहीर केल्यानंतर महापालिका निवडणुकांची घोषणा लवकरच होईल, अशी अपेक्षा आहे. अशा वेळी शितल म्हात्रे यांना दहीसरमधून महापालिका उमेदवारी मिळेल, अशी जोरदार चर्चा होती. मात्र, त्या या निवडणुकीत उतरण्यास इच्छुक नसल्याचे स्पष्ट झाले आहे. दोनदा नगरसेविका, प्रभाग समिती अध्यक्ष म्हणून कामगिरी शितल म्हात्रे यांनी २०१२ मध्ये दहीसर विधानसभा क्षेत्रातील वॉर्ड क्रमांक ८ मधून पहिल्यांदा शिवसेनेकडून नगरसेविका म्हणून विजय मिळवला. त्याआधी त्या पक्षाच्या महिला पदाधिकारी होत्या. दोनदा नगरसेविका म्हणून काम केलेल्या म्हात्रे यांनी प्रभाग समिती अध्यक्षपदही भूषवले. आक्रमक नेतृत्व आणि स्थानिक पातळीवरील कामगिरीमुळे त्यांची ओळख प्रस्थापित झाली होती. सध्या त्या एकनाथ शिंदे गटाच्या शिवसेनेच्या प्रवक्त्या म्हणून कार्यरत आहेत. पक्षश्रेष्ठींना स्पष्ट संदेश: महापालिका नाही, आमदारकी हवी मात्र, महापालिका निवडणुकीच्या पार्श्वभूमीवर शितल म्हात्रे यांनी पक्ष नेतृत्वाला आपली भूमिका स्पष्टपणे कळवली आहे. “मी महापालिका निवडणूक लढवणार नाही. वॉर्ड क्रमांक ७ मधून पक्ष ज्याला उमेदवारी देईल, त्याच्यासाठी पूर्ण ताकदीने काम करेन,” अशी ग्वाही त्यांनी दिली आहे. याउलट, त्या दहीसर विधानसभा मतदारसंघातून आमदारकीसाठी इच्छुक असल्याचे सूत्रांनी सांगितले. पक्षाने याबाबत विचार करावा, अशी अपेक्षा त्यांनी व्यक्त केली आहे. फुटीच्या वेळी आंदोलन ते शिंदे गटात सामील होण्याचा प्रवास २०२२ मध्ये एकनाथ शिंदे यांनी बंड पुकारले तेव्हा सुरुवातीला शितल म्हात्रे यांनी उद्धव ठाकरे गटाच्या बाजूने आंदोलन केले होते. मात्र, काही काळातच त्या शिंदे गटात सामील झाल्या. मध्यंतरी त्यांचे नाव काही वादांमध्येही आले होते. तरीही शिंदे गटात त्यांची भूमिका मजबूत राहिली आहे. महायुतीची रणनीती आणि म्हात्रेंची भूमिका महायुतीला (भाजपा-शिंदे शिवसेना-अजित पवार राष्ट्रवादी) मुंबई महापालिका निवडणूक काहीही करून जिंकायची आहे. त्यासाठी पक्षाने कंबर कसली आहे. शितल म्हात्रे यांचा स्थानिक स्तरावरील प्रभाव आणि निष्ठा लक्षात घेता, त्यांना प्रचारात महत्त्वाची जबाबदारी मिळण्याची शक्यता आहे. पक्ष त्यांच्या आमदारकीच्या इच्छेला कितपत प्राधान्य देणार, हे पाहावे लागेल. शितल म्हात्रे यांच्या या निर्णयामुळे दहीसरमधील राजकीय समीकरणांमध्ये बदल होण्याची शक्यता आहे. महापालिका निवडणुकीत त्या मैदानात न उतरल्याने पक्षाला नव्या चेहऱ्याचा शोध घ्यावा लागणार आहे.
