Share Market Today: भारतीय शेअर बाजाराने सोमवार, २९ डिसेंबर रोजी वर्षाच्या शेवटच्या ट्रेडिंग आठवड्याची सुरुवात मोठ्या घसरणीसह केली. विदेशी गुंतवणूकदारांनी केलेली सततची विक्री आणि कच्च्या तेलाच्या किमतीत झालेली वाढ यामुळे गुंतवणूकदारांच्या उत्साहावर विरजण पडले. मुंबई शेअर बाजाराचा निर्देशांक ‘सेन्सेक्स’ सुमारे ३४६ अंकांच्या म्हणजेच ०.४१ टक्क्यांच्या घसरणीसह ८४,६९५.५४ च्या पातळीवर बंद झाला. दुसरीकडे, राष्ट्रीय शेअर बाजाराचा ‘निफ्टी’ १००.२ अंकांनी घसरून २५,९४२.१० वर स्थिरावला. विशेष म्हणजे, सेन्सेक्स आणि निफ्टीमध्ये घसरण होण्याची ही सलग तिसरी वेळ आहे. बाजारातील या पडझडीमुळे बीएसईमध्ये सूचीबद्ध असलेल्या कंपन्यांचे एकूण बाजार भांडवल ४७३.९७ लाख कोटी रुपयांवरून घसरून ४७२.०९ लाख कोटी रुपयांवर आले आहे. याचा थेट अर्थ असा की, केवळ एका दिवसाच्या व्यवहारात गुंतवणूकदारांच्या मालमत्तेत सुमारे १.८९ लाख कोटी रुपयांची घट झाली आहे. जागतिक बाजारातून मिळालेले कमकुवत संकेत आणि वर्षाअखेर ट्रेडिंगचे प्रमाण कमी राहिल्याने गुंतवणूकदारांनी सावध भूमिका घेतल्याचे दिसून आले. क्षेत्रीय कामगिरीचा विचार करता, मीडिया क्षेत्र वगळता इतर सर्व प्रमुख निर्देशांक लाल चिन्हात बंद झाले. ऑटो, आयटी, फार्मा, रियल्टी आणि पॉवर क्षेत्रातील समभागांना विक्रीचा मोठा फटका बसला असून हे निर्देशांक ०.४ ते ०.९ टक्क्यांनी घसरले. सेन्सेक्समधील ३० पैकी केवळ ८ शेअर्समध्ये वाढ झाली, ज्यात टाटा स्टील १.८३ टक्क्यांच्या वाढीसह आघाडीवर राहिला. त्यापाठोपाठ एशियन पेंट्स, इटरनल, एनटीपीसी आणि ॲक्सिस बँक या कंपन्यांच्या शेअर्समध्ये माफक सुधारणा झाली. दुसरीकडे, अदाणी पोर्ट्सचा शेअर २.२२ टक्क्यांच्या घसरणीसह टॉप लूझर ठरला. एचसीएल टेक, पॉवर ग्रिड, ट्रेंट आणि भारत इलेक्ट्रॉनिक्सच्या शेअर्समध्येही १.८६ टक्क्यांपर्यंत घसरण नोंदवण्यात आली. बीएसईवर आज एकूण ४,५१२ शेअर्समध्ये व्यवहार झाले, ज्यापैकी २,७४८ शेअर्स घसरणीसह बंद झाले तर १,५६८ शेअर्समध्ये वाढ झाली. सुमारे १९५ शेअर्सनी आज ५२ आठवड्यांचा नीचांकी स्तर गाठला, तर ११५ शेअर्सनी ५२ आठवड्यांचा नवा उच्चांक प्रस्थापित केला. रुपया ९० च्या उंबरठ्यावर इक्विटी मार्केटसोबतच परकीय चलन बाजारातही चिंतेचे वातावरण आहे. डॉलरच्या तुलनेत रुपया सोमवारी ८ पैशांनी कमकुवत होऊन ८९.९८ या ऐतिहासिक नीचांकी स्तरावर बंद झाला. विदेशी संस्थागत गुंतवणूकदारांची (FII) सततची विक्री आणि कच्च्या तेलाच्या किमतीतील चढ-उतार यामुळे रुपयावर दबाव वाढत आहे. जर रुपयाने ९० ची पातळी ओलांडली, तर आयात महाग होऊन महागाई वाढण्याचा धोका विश्लेषकांनी व्यक्त केला आहे. ‘जियोजित इन्व्हेस्टमेंट’चे संशोधन प्रमुख विनोद नायर यांच्या मते, बाजारात सध्या नवीन तेजीसाठी कोणत्याही मोठ्या कारणाचा अभाव आहे. गुंतवणूकदार सुट्ट्यांच्या मूडमध्ये असल्याने व्यवहारांचे प्रमाण कमी आहे. तसेच, अमेरिकन फेडरल रिझर्व्हच्या व्याजदरांबाबतची अनिश्चितता आणि माहिती तंत्रज्ञान (IT) क्षेत्रातील विक्री यामुळे बाजार दबावाखाली राहिला. दरम्यान, आशियाई बाजारात संमिश्र कल पाहायला मिळाला. दक्षिण कोरियाचा ‘कोस्पी’ २ टक्क्यांनी वधारला, तर जपानचा ‘निक्केई’ आणि हाँगकाँगचा ‘हँग सेंग’ घसरणीसह बंद झाले. युरोपीय बाजारातही सोमवारी सुरुवातीच्या सत्रात घसरण पाहायला मिळाली.
