मुंबई – आज भारतीय शेअर बाजारात दिवसभर मोठे चढ-उतार दिसून आले, मात्र अखेरीस बाजार सलग दुसऱ्या दिवशी घसरणीसह बंद झाला. या घसरणीमुळे आज गुंतवणूकदारांचे सुमारे ४ लाख कोटी रुपये नुकसान झाले. बाजार बंद होताना बीएसई सेन्सेक्स १४८ अंकांनी (०.१८%) खाली येत ८३,३११.०१ च्या पातळीवर स्थिरावला. तर राष्ट्रीय शेअर बाजाराचा निफ्टी देखील ८८ अंकांनी (०.३४%) घसरून २५,५०९.७० च्या पातळीवर बंद झाला. मुख्य निर्देशांकांप्रमाणेच ब्रॉडर मार्केटमध्येही मोठी घसरण झाली. बीएसई मिडकॅप इंडेक्स १.२ टक्क्यांनी आणि स्मॉलकॅप इंडेक्स १.५ टक्क्यांपर्यंत खाली आले. या घसरणीमागे विदेशी गुंतवणूकदारांची सततची विक्री आणि साप्ताहिक एक्सपायरीमुळे निर्माण झालेली अस्थिरता प्रमुख कारणे ठरली. क्षेत्रांमध्ये संमिश्र चित्र आज अनेक क्षेत्रांमध्ये मोठी विक्री दिसली. मेटल, पॉवर, रियल्टी आणि मीडिया या क्षेत्रांतील समभाग सर्वाधिक तुटले. या इंडेक्समध्ये १.५ ते २.५ टक्क्यांची घसरण नोंदवली गेली. याउलट, एफएमसीजी, ऑटो आणि आयटी इंडेक्स मात्र किरकोळ वाढीसह हिरव्या निशाणात बंद झाले. गुंतवणूकदारांच्या संपत्तीत घट बीएसईवर सूचीबद्ध असलेल्या कंपन्यांचे एकूण बाजार भांडवल (Market Capitalization) आज सुमारे ४.०२ लाख कोटी रुपयांनी घटले. मागील सत्रातील ४६९.८० लाख कोटी रुपयांवरून ते आज ४६५.७८ लाख कोटी रुपयांवर आले. सेन्सेक्समधील समभागांची स्थिती सेन्सेक्समधील ३० पैकी केवळ ११ समभाग आज वाढीसह बंद झाले. यामध्ये एशियन पेंट्सच्या शेअर्समध्ये ४.७६ टक्क्यांची सर्वाधिक तेजी दिसली. याशिवाय, रिलायन्स इंडस्ट्रीज, महिंद्रा अँड महिंद्रा, अल्ट्राटेक सिमेंट आणि टीसीएस यांचे शेअर्स देखील ०.७१ टक्क्यांपासून १.६२ टक्क्यांपर्यंत वाढले. दुसरीकडे, सेन्सेक्समधील १९ समभाग घसरले. पॉवरग्रिडचा शेअर ३.१५ टक्क्यांच्या घसरणीसह टॉप लूजर राहिला. इटरनल, भारत इलेक्ट्रॉनिक्स, बजाज फायनान्स आणि आयसीआयसीआय बँकेच्या शेअर्समध्ये १.२१ टक्क्यांपासून २.४४ टक्क्यांपर्यंत घट झाली. आज बीएसईवर एकूण ४,३५३ शेअर्समध्ये व्यवहार झाला. त्यापैकी ३,०११ शेअर्समध्ये घसरण झाली, तर १,२०३ शेअर्स वाढीसह बंद झाले. आज १२४ शेअर्सनी आपला ५२ आठवड्यांचा उच्चांक गाठला, तर १७३ शेअर्सनी ५२ आठवड्यांचा नवा नीचांक गाठला.
