Share Market Today: भारतीय शेअर बाजारात आज, ३० डिसेंबर रोजी सलग दुसऱ्या सत्रात मोठी अस्थिरता पाहायला मिळाली. विदेशी गुंतवणूकदारांनी सुरू ठेवलेली विक्री आणि कमकुवत जागतिक संकेतांमुळे आज बाजार पुन्हा एकदा लाल निशाणात बंद झाला. व्यवहाराच्या शेवटी मुंबई शेअर बाजाराचा निर्देशांक सेन्सेक्स २०.४६ अंकांनी घसरून ८४,६७५.०८ च्या पातळीवर स्थिरावला, तर राष्ट्रीय शेअर बाजाराचा निफ्टी ३.२५ अंकांच्या किरकोळ घसरणीसह २५,९३८.८५ वर बंद झाला. अमेरिकेच्या फेडरल रिझर्व्हच्या डिसेंबरमधील बैठकीचे तपशील समोर येण्यापूर्वी गुंतवणूकदारांनी सावध पवित्रा घेतल्याचे बाजारात दिसून आले. बाजारातील या किरकोळ घसरणीचा मोठा फटका गुंतवणूकदारांच्या मालमत्तेला बसला आहे. बीएसईमध्ये सूचिबद्ध असलेल्या कंपन्यांचे एकूण बाजार भांडवल ४७२.१५ लाख कोटी रुपयांवरून कमी होऊन ४७१.९३ लाख कोटी रुपयांवर आले आहे. याचाच अर्थ केवळ एका दिवसाच्या व्यवहारात गुंतवणूकदारांची सुमारे २२,००० कोटी रुपयांची संपत्ती घटली आहे. मिडकॅप आणि स्मॉलकॅप निर्देशांकातही आज फारशी हालचाल न दिसता ते सपाट पातळीवर बंद झाले. क्षेत्रीय कामगिरीचा विचार करता आज बाजारात संमिश्र कल दिसून आला. मेटल आणि सार्वजनिक क्षेत्रातील बँकांच्या (PSU Bank) शेअर्समध्ये सुमारे २ टक्क्यांची जोरदार वाढ झाली, तर ऑटो इंडेक्समध्ये १ टक्क्याची सुधारणा नोंदवण्यात आली. याउलट आयटी, रियल्टी, हेल्थकेयर आणि संरक्षण क्षेत्रातील शेअर्समध्ये ०.५% ते १% पर्यंत घसरण झाली. सेन्सेक्समधील ३० पैकी केवळ १२ शेअर्स आज नफ्यात राहिले, ज्यात टाटा स्टीलने २.०३ टक्क्यांसह आघाडी घेतली. त्याखालोखाल महिंद्रा अँड महिंद्रा, बजाज फिनसर्व्ह, ॲक्सिस बँक आणि स्टेट बँक ऑफ इंडियाच्या शेअरमध्ये वाढ झाली. दुसरीकडे, इटरनलचा शेअर २.१० टक्क्यांच्या घसरणीसह सर्वाधिक तोट्यात राहिला. इंडिगो, इन्फोसिस, एशियन पेंट्स आणि अल्ट्राटेक सिमेंट यांसारख्या मोठ्या शेअर्समध्येही ०.८४ ते १.३७ टक्क्यांपर्यंत घसरण झाली. आज दिवसभरात एकूण ४,३४७ शेअर्समध्ये व्यवहार झाले, त्यापैकी २,२५८ शेअर्स घसरणीसह बंद झाले तर १,९२१ शेअर्समध्ये वाढ पाहायला मिळाली. १०८ शेअर्सनी आज ५२ आठवड्यांचा नवा उच्चांक गाठला, तर १९५ शेअर्स ५२ आठवड्यांच्या नीचांकी पातळीवर पोहोचले.
