Share Market: भारतीय शेअर बाजारात सोमवारी मोठ्या चढ-उतारासह व्यवहार झाले. सुरुवातीच्या जोरदार तेजीनंतर बाजारात नफावसुलीचे सत्र सुरू झाले आणि यामुळे सेन्सेक्स आणि निफ्टी दोन्ही निर्देशांक आपली सर्व कमाई गमावून लाल निशाणीवर बंद झाले. मात्र, या घसरणीपूर्वीच दोन्ही निर्देशांकांनी नवा सर्वकालीन उच्चांक गाठला. निफ्टीने २६,३२५ चा शिखर गाठला होता, पण ही तेजी टिकू शकली नाही. सेन्सेक्स ६५ अंकांनी घसरून ८५,६४२ वर बंद झाला तर निफ्टी २७ अंकांनी घसरून २६,१७६ वर बंद झाला. मिडकैप इंडेक्स ६१,०४३ वर स्थिर राहिला. निफ्टी बँक इंडेक्स ७१ अंकांनी घसरून ५९,६८१ वर बंद झाला. बाजार घसरणीत बंद झाला असला तरी, बीएसई लिस्टेड कंपन्यांचे एकूण बाजार भांडवल वाढले आहे. हे भांडवल ४७४.३५ लाख कोटींवरून ४७४.४८ लाख कोटी रुपयांवर पोहोचले. यामुळे गुंतवणूकदारांच्या संपत्तीत सुमारे १३,००० कोटी रुपयांची वाढ झाली. ऑटो (Auto) शेअरमध्ये १ टक्क्यांहून अधिक वाढ दिसून आली. टाटा मोटर्स (PV) आणि मारुती सुझुकीच्या नोव्हेंबरमधील अपेक्षेपेक्षा चांगल्या विक्रीमुळे या शेअर्समध्ये तेजी दिसली. सेन्सेक्समधील ३० पैकी १६ शेअर्स तेजीसह बंद झाले. टाटा मोटर्स पॅसेंजर व्हेइकल (TMPV) १.९३% वाढीसह अव्वल ठरला. याशिवाय मारुती, भारत इलेक्ट्रॉनिक्स, कोटक बँक आणि एचसीएल टेक हे तेजीमध्ये राहिले. दुसरीकडे, बजाज फायनान्स सर्वाधिक १.६५% घसरून ‘टॉप लूझर्स’ ठरला. सन फार्मा, ट्रेंट, एसबीआय आणि बजाज फिनसर्व्ह यांसारख्या शेअर्समध्येही घसरण झाली.
