Share Market : गेल्या वर्षाच्या अर्थसंकल्पात दीर्घ आणि लघु पल्ल्याच्या भांडवली उत्पन्नावरील करात वाढ करण्यात आली होती. रविवारी सादर झालेल्या अर्थसंकल्पात फ्युचर अँड ऑप्शनवरील उलाढालीवर म्हणजे रोखे विनिमय करात मोठी वाढ करण्यात आल्यामुळे गुंतवणूकदार व ब्रोकर्स नाराज झाले. परिणामी रविवारी अर्थसंकल्पाच्या दिवशी शेअर बाजाराचे निर्देशांक जवळजवळ दोन टक्क्यांनी कोसळले.आशावादी गुंतवणूकदाराकडून सकाळी खरेदी झाली होती. मात्र अर्थमंत्र्यांनी रोखे व्यवहारावरील कर रचनेत वाढ जाहीर केल्यानंतर निर्देशांक 2.88 टक्क्यांनी कोसळले होते. मात्र नंतर काही प्रमाणात सुधारणा झाली. मुंबई शेअर बाजाराचा निर्देशांक सेन्सेक्स बाजार बंद होताना 1,546 अंकांनी म्हणजे 1.88 टक्क्यांनी कोसळून 80,722 अंकावर बंद झाला. विश्लेषकांनी सांगितले की, फ्युचरवरील रोखे विनिमय कर 0.02 टक्क्यावरून 0.05% इतका करण्यात आला आहे. राष्ट्रीय शेअर बाजाराचा निर्देशांक निफ्टी 495 अंकांनी म्हणजे 1.96 टक्क्यांनी कोसळून 24,825 अंकावर बंद झाला. विश्लेषकांनी सगितले की, सरलेल्या वर्षी शेअर बाजारांनी कमी परतावा दिला असल्यामुळे अर्थमंत्री या आघाडीवर काही सवलत देतील अशी बाजाराला अपेक्षा होती. मात्र त्या उलट अर्थमंत्र्यांनी फ्युचर आणि ऑप्शन व्यवहारावर कर वाढविला आहे. अशा परिस्थितीत गुंतवणूक निराश झाले आहेत. जागतिक शेअर बाजारातील रोखे विनिमय करापेक्षा भारतातील कर जास्त झाल्यामुळे परदेशी संस्थागत गुंतवणूकदार या क्षेत्रात भारतात गुंतवणूक करतील की नाही याबद्दल शंका निर्माण झाल्या आहेत. Share Market। अर्थसंकल्पाच्या भाषणानंतर स्टेट बँक, अदानी पोर्ट्स, भारत इलेक्ट्रॉनिक्स, आयटीसी, टाटा स्टील, अल्ट्राटेक सिमेंट, रिलायन्स इंडस्ट्रीज या कंपन्यांनी सपाटून मार खाल्ला. टीसीएस, इन्फोसिस, सन फार्मा आणि टायटन या कंपन्यांच्या शेअरच्या भावात थोडेफार वाढ झाली. शेअर बाजारात आज माहिती तंत्रज्ञान कंपन्यांच्या शेअरच्या भावात थोडी फार वाढ झाली. मात्र इतर क्षेत्राचे निर्देशांक पिछाडीवर होते. जागतिक गुंतवणूकदार संस्था बर्याच प्रमाणात फ्युचर आणि ऑप्शनमध्ये व्यवहार करीत असतात. त्या व्यवहारावर किमान नजीकच्या भविष्यात परिणाम होण्याची शक्यता आहे. विशेष म्हणजे शुक्रवारी परदेशी संस्थागत गुंतवणूकदारांनी 2,251 कोटी रुपयांच्या शेअरची खरेदी केली होती. मात्र त्यांचा हा उत्साह आगामी काळात टिकणार नाही असे समजले जात आहे. जिओजीत इन्व्हेस्मेंट या कंपनीचे संशोधन प्रमुख विनोद नायर यांनी सांगितले की, अर्थसंकल्पात जागतिक व्यापार युद्धाचा ज्या क्षेत्रावर परिणाम झाला आहे त्या क्षेत्रातना बर्याच सवलती दिल्या आहेत. त्यामध्ये ग्लोबल कॅपॅबिलिटी सेंटर, डाटा सेंटर, सेमीकंडक्टर, औषधी, रेअर अर्थ मेटल, मनुफॅक्चरिंग, कापड, समुद्री खाद्य, लघुउद्योग इत्यादीचा समावेश आहे. यामुळे शेअर बाजारात सकारात्मक वातावरण निर्माण होण्याची शक्यता निर्माण झाली असतानाच अर्थमंत्र्यांनी सिक्युरिटीज ट्रांजेक्शन टॅक्स वाढविल्यामुळे गुंतवणूकदारांचा भ्रमनिरास झाला आहे. सिक्युरिटी ट्रांजेक्शन टॅक्समुळे ब्रोकरच्या कामावर परिणाम होईल. त्याचा इतर क्षेत्रावर म्हणजे मालमत्ता व्यवस्थापन करणार्या कंपन्यावरही परिणाम होण्याची शक्यता आहे असे त्यांनी सांगितले. क्षेत्र घट सरकारी बँका 5.60% धातू 3.85% कमॉडिटीज 3.35% एनर्जी 3.14% भांडवली वस्तू 3.02% युटीलिटीज 2.98% इंडस्ट्रियल्स 2.66% ऊर्जा 2.52%
