Share Market Today: भारतीय शेअर बाजारात गुरुवार, 1 ऑगस्ट रोजी एक नवा विक्रम झाला. सेन्सेक्सने प्रथमच 82,000 चा टप्पा पार केला. निफ्टीनेही प्रथमच 25,000 चा टप्पा पार करत नवा उच्चांक गाठला. तथापि, महागड्या मूल्यांकनाच्या चिंतेमुळे मिडकॅप आणि स्मॉलकॅप समभागांमध्ये नफा बुकिंग झाले.

बीएसईचा मिडकॅप निर्देशांक 0.80 टक्क्यांच्या घसरणीसह आणि स्मॉलकॅप निर्देशांक 0.70 टक्क्यांच्या घसरणीसह बंद झाला. त्यामुळे शेअर बाजारातील गुंतवणूकदारांच्या संपत्तीत एका दिवसात सुमारे 74,000 कोटी रुपयांची घट झाली आहे. आजच्या व्यवहारात पॉवर, युटिलिटी, तेल आणि वायू समभागात वाढ झाली. दुसरीकडे, आयटी, दूरसंचार, बँकिंग, ग्राहकोपयोगी वस्तू आणि रियल्टी समभागांमध्ये घसरण दिसून आली.

व्यवहाराच्या शेवटी, बीएसई सेन्सेक्स 126.38 अंकांनी किंवा 0.15% ने वाढून 81,867.73 वर बंद झाला. व्यवहारादरम्यान, सेन्सेक्सने 82,129.49 या नवीन सार्वकालिक उच्चांकाला स्पर्श केला. तर NSE चा 50 शेअर्सचा निर्देशांक निफ्टी 52.85 अंक किंवा 0.21% च्या वाढीसह 25,004.00 वर बंद झाला. निफ्टीनेही व्यवहारादरम्यान 25,078.30 चा नवीन शिखर गाठले होते.

गुंतवणूकदारांचे 74 हजार कोटी रुपये बुडाले –

BSE वर सूचीबद्ध कंपन्यांचे एकूण बाजार भांडवल आज 1 ऑगस्ट रोजी 461.64 लाख कोटी रुपयांवर घसरले, जे त्याच्या आधीच्या ट्रेडिंग दिवशी म्हणजेच बुधवार, 31 जुलै रोजी 462.38 लाख कोटी रुपये होते. अशाप्रकारे, BSE मध्ये सूचीबद्ध कंपन्यांचे मार्केट कॅप आज सुमारे 70,000 कोटी रुपयांनी कमी झाले आहे. गुंतवणूकदारांच्या संपत्तीत सुमारे 70,000 कोटी रुपयांची घट झाली आहे.

सेन्सेक्सचे 5 सर्वाधिक वाढणारे समभाग –

आज BSE सेन्सेक्समधील 30 पैकी 15 शेअर्स वाढीसह बंद झाले. त्यातही पॉवर ग्रिडच्या शेअर्समध्ये सर्वाधिक ३.८४ टक्के वाढ झाली. यानंतर एचडीएफसी बँक, एनटीपीसी, नेस्ले इंडिया आणि अदानी पोर्ट्सचे शेअर्स सर्वाधिक वाढले आणि 1.07% ते 1.85% च्या वाढीसह बंद झाले.

सेन्सेक्सचे सर्वाधिक घसरलेले 5 समभाग –

तर सेन्सेक्समधील उर्वरित १५ समभाग आज घसरणीसह बंद झाले. यामध्येही महिंद्रा अँड महिंद्रा (M&M) चे समभाग 2.76 टक्क्यांनी घसरले. याशिवाय टाटा स्टील, बजाज फिनसर्व्ह, स्टेट बँक ऑफ इंडिया (SBI) आणि लार्सन अँड टुब्रो (L&T) चे समभाग 1.14% ते 1.36% घसरून लाल रंगात बंद झाले.