Share Market Rise : भारतीय शेअर बाजाराने आज सलग तिसऱ्या दिवशी तेजीचा वेग कायम ठेवला. आजच्या व्यवहारात सेन्सेक्स सुमारे ४५० अंकांनी उसळून ८३,१४१.२१ च्या पातळीवर पोहोचला होता, तर निफ्टी ११५ अंकांच्या वाढीसह २५,४४८.९५ वर व्यवहार करत होता. गेल्या १४ व्यवहार दिवसांत निफ्टीने १,००० अंकांहून अधिक उसळी घेतली आहे. व्यवहाराच्या शेवटी सेन्सेक्स ३२०.२५ अंक (०.३९%) वाढीसह ८३,०१३.९६ वर बंद झाला, तर निफ्टी ९३.३५ अंक (०.३७%) च्या वाढीसह २५,४२३.६० वर स्थिरावला.

आजच्या व्यवहारात आयटी आणि फार्मा क्षेत्रातील समभागांमध्ये सर्वाधिक तेजी दिसून आली. बाजारातील तेजीमागील ६ प्रमुख कारणे जाणून घेऊया.. मार्केट तज्ज्ञांच्या मते, आजच्या तेजीमागे खालील सहा प्रमुख कारणे आहेत:

अमेरिकी फेडरल रिझर्व्हचा व्याजदर कपातीचा निर्णय –
अमेरिकी फेडरल रिझर्व्ह बँकेने व्याजदरात ०.२५% कपात केली, ज्यामुळे दर ४.००% ते ४.२५% पर्यंत पोहोचला. डिसेंबर २०२४ नंतर फेडने व्याजदरात कपात करण्याची ही पहिलीच वेळ आहे. फेडने हे पाऊल प्रामुख्याने कामगार बाजारपेठेतील मंदीमुळे उचलले. याशिवाय, यावर्षी आणखी दोन दर कपातीचे संकेत दिल्याने बाजाराला सकारात्मक संदेश मिळाला. एक्सिस सिक्युरिटीजचे वरिष्ठ उपाध्यक्ष (संशोधन) राजेश पालविया म्हणाले, “हा निर्णय भारतीय बाजारासाठी सकारात्मक आहे, कारण यामुळे परदेशी गुंतवणूकदारांचा ओघ वाढण्याची शक्यता आहे.”

जागतिक बाजारातील सकारात्मक संकेत –
जागतिक शेअर बाजारातून सकारात्मक संकेत मिळाले. जपान, दक्षिण कोरिया आणि शांघायमधील प्रमुख निर्देशांक तेजीत राहिले, तर हाँगकाँगचा हँगसेंग निर्देशांक किरकोळ घसरणीसह लाल रंगात बंद झाला. अमेरिकी बाजार मिश्र स्वरूपात बंद झाले, परंतु फेडरल रिझर्व्हच्या दर कपातीमुळे गुंतवणूकदारांचा आत्मविश्वास वाढला आहे.

कच्च्या तेलाच्या किमतीत घसरण –
आंतरराष्ट्रीय बाजारात ब्रेंट क्रूडच्या किमती ०.१६ टक्क्यांनी घसरून ६७.८६ डॉलर प्रति बॅरलवर आल्या. यामुळे भारताचा आयात खर्च कमी होईल आणि महागाईवरील दबाव कमी होण्याची शक्यता आहे.

व्होलॅटिलिटी इंडेक्समध्ये घसरण –
बाजारातील अस्थिरतेचे निर्देशक इंडिया VIX २.७६ टक्क्यांनी घसरून ९.९६ वर आला. यामुळे गुंतवणूकदारांमध्ये स्थिरतेची भावना दिसून येत आहे.

भारत-अमेरिका व्यापार कराराची अपेक्षा –
भारत आणि अमेरिका यांच्यातील व्यापार करारासंदर्भातील चर्चेमुळे बाजाराचा आत्मविश्वास वाढला. अमेरिकेचे व्यापार प्रतिनिधी ब्रेंडन लिंच यांनी नुकतीच नवी दिल्लीत टॅरिफविषयक चर्चा केली.

आयटी समभागांमध्ये खरेदीचा जोर –
फेडरल रिझर्व्हच्या दर कपातीनंतर आयटी समभागांमध्ये जोरदार खरेदी दिसून आली. निफ्टी आयटी निर्देशांक १.५ टक्क्यांनी वाढून ३७,००६ वर पोहोचला. गेल्या तीन दिवसांपासून आयटी समभाग सातत्याने तेजीत आहेत.

तांत्रिक तज्ज्ञांचे मत काय?
जियोजित फायनान्शियल सर्व्हिसेसचे मुख्य बाजार रणनीतीकार आनंद जेम्स यांच्या मते, निफ्टी २५,४००–२५,६०० च्या टप्प्यात जाऊ शकतो. मात्र, २५,२८० ही खालची पातळी आहे. जर निफ्टी २५,२०० च्या खाली गेला, तर बाजार २४,८०० पर्यंत घसरण्याची शक्यता आहे.

अमेरिकी फेडरल रिझर्व्हच्या व्याजदर कपातीच्या निर्णयासह जागतिक आणि स्थानिक सकारात्मक संकेतांमुळे भारतीय शेअर बाजाराने आज पुन्हा एकदा आपली चमक दाखवली. आयटी आणि फार्मा क्षेत्रातील समभागांनी बाजाराला चालना दिली, तर तेलाच्या किमतीतील घसरण आणि व्यापार कराराच्या अपेक्षांनी गुंतवणूकदारांचा आत्मविश्वास वाढवला आहे.