Stock Market : भारतीय शेअर बाजाराने शुक्रवारी सलग दोन दिवसांच्या घसरणीला ब्रेक दिला. माहिती-तंत्रज्ञान (IT) क्षेत्रातील दिग्गज कंपन्यांच्या शेअर्समध्ये झालेल्या खरेदीमुळे तसेच जागतिक बाजारातील सकारात्मक वातावरणाचा फायदा मिळाल्याने सेन्सेक्स आणि निफ्टी तेजीसह बंद झाले.

30 शेअर्सचा सेन्सेक्स 330.92 अंकांनी (0.43 टक्के) वाढून 77,264.51 अंकांवर स्थिरावला. दिवसभरात सेन्सेक्सने 424.38 अंकांची उसळी घेत 77,357.97 अंकांची उच्चांकी पातळी गाठली. तर निफ्टी 84.80 अंकांनी (0.35 टक्के) वाढून 24,175.65 अंकांवर बंद झाला.

सेन्सेक्समधील कंपन्यांमध्ये टाटा कन्सल्टन्सी सर्व्हिसेस (TCS), इन्फोसिस, टेक महिंद्रा, एचसीएल टेक, टायटन आणि इटर्नल यांच्या शेअर्समध्ये चांगली वाढ झाली. दुसरीकडे आयसीआयसीआय बँक, अल्ट्राटेक सिमेंट, एशियन पेंट्स आणि आयटीसी हे शेअर्स घसरणारे प्रमुख ठरले.

जागतिक बाजारातही संमिश्र स्थिती पाहायला मिळाली. दक्षिण कोरियाचा कोस्पी आणि चीनचा शांघाय एसएसई कम्पोझिट निर्देशांक घसरणीसह बंद झाले. मात्र, जपानचा निक्केई 225 आणि हाँगकाँगचा हँग सेंग निर्देशांक तेजीत राहिला. युरोपीय बाजार सकारात्मक पातळीवर व्यवहार करत होते, तर अमेरिकेतील बाजार गुरुवारी वाढीसह बंद झाले.

दरम्यान, ब्रेंट क्रूडचा भाव 0.17 टक्क्यांनी घसरून 89.63 डॉलर प्रति बॅरल झाला.

जिओजित इन्व्हेस्टमेंट्स लिमिटेडचे संशोधन प्रमुख विनोद नायर यांच्या मते, IT शेअर्समधील मजबूत खरेदीमुळे भारतीय बाजाराला आधार मिळाला. एनव्हिडिया च्या मजबूत निकालांमुळे आणि सकारात्मक अंदाजामुळे कृत्रिम बुद्धिमत्ता (AI) क्षेत्रातील गुंतवणुकीबाबत आशावाद वाढला असून, त्याचा फायदा एंटरप्राइज AI आणि वर्कफ्लो इंटिग्रेशनशी संबंधित कंपन्यांना झाला.

मात्र, अमेरिकेच्या व्याजदराच्या पुढील दिशेबाबत गुंतवणूकदारांचे लक्ष फेडरल रिझर्व्हचे अध्यक्ष जॅक्सन होल परिसंवादातील भाषणाकडे लागले आहे. त्यामुळे बाजारातील गुंतवणूक मर्यादित आणि निवडक राहिली.

दरम्यान, गुरुवारी विदेशी संस्थात्मक गुंतवणूकदारांनी (FIIs) भारतीय शेअर बाजारातून 298.26 कोटी रुपयांची निव्वळ विक्री केली होती. गुरुवारी सेन्सेक्स 539.35 अंकांनी, तर निफ्टी 116.90 अंकांनी घसरला होता.