Stock Market : दोन दिवसांच्या तेजीनंतर सेन्सेक्स 500 अंकांनी घसरला; ‘या’ 4 कारणांचा परिणाम
Stock Market : अमेरिकेत व्याजदर वाढण्याच्या चर्चेचा आणि जागतिक बाजारातील कमजोरीचा भारतीय शेअर बाजारावर परिणाम झाला. सलग दोन दिवसांच्या तेजीनंतर बुधवारी गुंतवणूकदारांनी नफा वसुली केल्याने सेन्सेक्स आणि निफ्टी घसरून बंद झाले.

Stock Market : भारतीय शेअर बाजारातील दोन दिवसांची तेजी बुधवारी थांबली. मुंबई शेअर बाजाराचा सेन्सेक्स ५००.३८ अंकांनी (०.६१%) घसरून ८२,०३१.८१ अंकांवर बंद झाला. दिवसभरात तो ७५१ अंकांहून अधिक घसरला होता. राष्ट्रीय शेअर बाजाराचा निफ्टी १५९.४५ अंकांनी (०.६३%) घसरून २५,२२७.९५ अंकांवर स्थिरावला.
टायटनचा शेअर सर्वाधिक ४.८२ टक्के घसरला. टीसीएस, बजाज फायनान्स, इटर्नल, इंडिगो आणि इन्फोसिस यांचे शेअर्सही घसरले. तर एसबीआय, आयटीसी, अल्ट्राटेक सिमेंट आणि पॉवर ग्रिडच्या शेअर्समध्ये वाढ झाली.
अमेरिकेची मध्यवर्ती बँक फेडरल रिझर्व्ह व्याजदर वाढवू शकते, या चर्चेमुळे गुंतवणूकदार सावध झाले. अमेरिकन बाजारातील घसरण आणि अलीकडील तेजीमुळे नफा वसुलीचा दबाव वाढला. मात्र, परदेशी गुंतवणूक आणि कच्च्या तेलाच्या दरातील नरमाईमुळे रुपयाला काहीसा आधार मिळत आहे.
१७ नोव्हेंबरपर्यंत नोव्हेंबर महिन्यात सेन्सेक्स जवळपास ११ टक्के, तर निफ्टी १० टक्क्यांहून अधिक वाढला होता.
आज गुंतवणूकदारांचे ₹५.१५ लाख कोटींचे नुकसान –
एक व्यवहार दिवसापूर्वी म्हणजेच १७ नोव्हेंबर २०२६ रोजी बीएसईवर (BSE) सूचीबद्ध असलेल्या सर्व शेअर्सचे एकूण बाजार भांडवल (मार्केट कॅप) ₹५,११,७१,१२१.५७ कोटी इतके होते. आज, १८ नोव्हेंबर २०२६ रोजी ते घसरून ₹५,०६,५५,३३४.९४ कोटींवर आले आहे. याचाच अर्थ, आज गुंतवणूकदारांच्या संपत्तीत ₹५,१५,७८६.६३ कोटींची घट झाली आहे.
बाजारातील घसरणीची प्रमुख कारणे –
– नफा वसुली: दोन दिवसांच्या तेजीमुळे वाढलेल्या शेअर्समधून गुंतवणूकदारांनी नफा काढला.
– अमेरिकेतील व्याजदरांची चिंता: फेडरल रिझर्व्ह व्याजदर वाढवू शकते, या शक्यतेने गुंतवणूकदार सावध झाले.
– जागतिक बाजारातील कमजोरी: अमेरिकेतील शेअर बाजार घसरल्याचा परिणाम भारतीय बाजारावरही झाला.
– महाग रोखे परतावा: सरकारी रोख्यांवरील परतावा वाढल्याने शेअर्सचे आकर्षण कमी होऊ शकते.





