Stock Market Crash : कच्च्या तेलाच्या वाढत्या किमती, अमेरिका-इराणमधील तणाव आणि जागतिक बाजारातील कमजोर स्थितीचा मोठा परिणाम सोमवारी भारतीय शेअर बाजारावर झाला. सेन्सेक्स तब्बल 1,124 अंकांनी घसरून सहा महिन्यांच्या नीचांकी पातळीवर बंद झाला. निफ्टीही 22,800 च्या खाली गेला.

बीएसई सेन्सेक्स 1,124.02 अंकांनी म्हणजेच 1.52 टक्क्यांनी घसरून 72,771.72 अंकांवर बंद झाला. दिवसभरात सेन्सेक्स 1,179.51 अंकांनी घसरून 72,716.23 अंकांपर्यंत खाली आला. 30 मार्च 2026 नंतरची ही सर्वात कमी बंद पातळी आहे.

एनएसई निफ्टी 360.25 अंकांनी म्हणजेच 1.56 टक्क्यांनी घसरून 22,780.25 अंकांवर बंद झाला. निफ्टीतील 50 पैकी 47 समभाग घसरले, तर केवळ 3 समभाग वाढले.

घसरणीची कारणे काय ?

बाजारातील घसरणीमागे कच्च्या तेलाच्या किमतीतील मोठी वाढ, अमेरिका-इराणमधील तणाव, परदेशी गुंतवणूकदारांकडून सुरू असलेली विक्री, अमेरिकेतील रोख्यांच्या वाढलेल्या परताव्याचे दर आणि आशियाई बाजारातील कमजोरी ही प्रमुख कारणे असल्याचे विश्लेषकांनी सांगितले.

सेन्सेक्समधील 30 पैकी 29 कंपन्यांचे समभाग घसरले. लार्सन अँड टुब्रोचा समभाग सर्वाधिक 2.81 टक्क्यांनी घसरला. पॉवर ग्रिड 2.62 टक्के, अदानी पोर्ट्स 2.38 टक्के, एचडीएफसी बँक 2.30 टक्के, हिंदुस्तान युनिलिव्हर 2.27 टक्के आणि रिलायन्स इंडस्ट्रीज 2.24 टक्क्यांनी घसरले. इन्फोसिसचा समभाग मात्र वाढला.

जागतिक बाजारात कच्च्या तेलाचा प्रमुख दर असलेले ब्रेंट क्रूड 3.81 टक्क्यांनी वाढून प्रति बॅरल 108.30 डॉलरवर पोहोचले. शुक्रवारी परदेशी संस्थात्मक गुंतवणूकदारांनी भारतीय शेअर बाजारातून 3,693.93 कोटी रुपयांच्या समभागांची विक्री केली होती.

तज्ज्ञांचे मत काय ?

जिओजित इन्व्हेस्टमेंट्सचे संशोधन प्रमुख विनोद नायर यांच्या मते, अमेरिका-इराणमधील युद्धविरामाच्या प्रस्तावाबाबत अमेरिकेच्या भूमिकेमुळे पश्चिम आशियातील तणाव अधिक काळ कायम राहण्याची चिंता वाढली आहे. त्यामुळे तेलाचा पुरवठा आणि वस्तूंच्या किमतीवर दबाव वाढण्याची शक्यता आहे.

अमेरिकेतील रोख्यांच्या वाढत्या परताव्यामुळे भारत आणि अमेरिकेतील व्याजदरातील फरक कमी होत आहे. यामुळे परदेशी गुंतवणूकदारांकडून भारतातून निधी बाहेर जाण्याचा दबाव वाढू शकतो, असेही नायर यांनी सांगितले.

आशियातील दक्षिण कोरियाचा कोस्पी, जपानचा निक्केई 225 आणि शांघाय एसएसई निर्देशांक घसरले. हाँगकाँगचा हँग सेंग मात्र वाढीसह बंद झाला. युरोपीय बाजारात संमिश्र स्थिती होती.

शुक्रवारी सेन्सेक्स 315.20 अंकांनी वाढून 73,895.74 अंकांवर, तर निफ्टी 77.40 अंकांनी वाढून 23,140.50 अंकांवर बंद झाला होता.