मुंबई : मुंबई क्रिकेट संघटनेची (एमसीए) बहुचर्चित त्रैवार्षिक निवडणूक पार पडत आहे. अध्यक्षपदासाठी शरद पवार-आशीष शेलार गटाचे उमेदवार अमोल काळे आणि मुंबई क्रिकेट गटाचे उमेदवार माजी क्रिकेटपटू संदीप पाटील यांच्यात चुरस पाहायला मिळणार आहे. याच निवडणुकीच्या पूर्वसंध्येला आयोजित करण्यात आलेल्या स्नेहभोजन समारंभात राज्याचे मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि राष्ट्रवादी काँग्रेसचे अध्यक्ष शरद पवार एकाच मंचावर दिसून आले. यावेळी तिन्ही नेत्यांनी एकमेकांवर टोलेबाजी केल्याचे पाहायला मिळत आहे.

शरद पवार यांनी यावेळी आपली पत्नी शिंदे कुटुंबातील असल्याचे मुख्यमंत्री शिंदे शेजारी बसलेले असतानाच सांगितलेशरद पवार यांनी आपल्या छोटेखानी भाषणामध्ये सासर हे शिंदे होते आणि ते उत्तम क्रिकेटर होते असा संदर्भ मिश्कीलपणे दिला. माझे सासरे शिंदे होते म्हणून शिंदेंनी आपल्या जावयाची काळजी घ्यावी असा मिश्कील टोला पवारांनी मुख्यमंत्र्यांना लवगला.  “माझे सासरे शिंदे होते,” असं पवारांनी हातवारे करुन म्हणताच सभागृहात एकच हशा पिकला.

पुढे पवारांनी, “नुसते शिंदे नव्हते क्रिकेटर होते. शिंदेंची मुलगी पवारांची बायको आहे. त्यामुळे शिंदेंनी आपल्या मुलीची काळजी नीट घेण्यासाठी जावयाच्या ज्या काही सूचना असतील त्याचा गांभीर्याने विचारल कराल, अशी विनंती करतो,” असे  पवार म्हणाले. या टोलेबाजीला सभागृहात उपस्थित असणाऱ्या एमसीएच्या पदाधिकाऱ्यांनी टाळ्या वाजवून दाद दिली.