पुणे : बारामती तालुक्यातील माळेगाव बुद्रुक नगरपंचायत निवडणुकीच्या पार्श्वभूमीवर राजकीय वातावरण प्रचंड तापले आहे. राष्ट्रवादी काँग्रेस (शरदचंद्र पवार) पक्षाच्या बारामती शहराध्यक्ष नितीन तावरे यांच्यावर अज्ञात समाजकंटकांनी प्राणघातक हल्ला केला. ही घटना निवडणूक लढवण्याच्या रागातून घडल्याचा आरोप होत आहे. या हल्ल्याने खळबळ उडाली असून, बारामतीच्या खासदार सुप्रिया सुळे यांनी तीव्र संताप व्यक्त केला आहे. त्यांनी सोशल मीडियावर ट्विट करत म्हटले आहे, “लोकशाहीत निवडणूक लढणे हा प्रत्येकाचा मूलभूत अधिकार आहे. या अधिकारावर घाला घालून विरोधी पक्षाचा आवाज दडपण्याचा हा भ्याडपणाचा प्रयत्न अत्यंत निंदनीय आहे. हल्लेखोरांवर कठोरात कठोर कारवाई करावी, ही शासनाला विनंती. नितीन तावरे लवकर बरे व्हावेत, ही प्रार्थना.” दरम्यान, दुसरीकडे अजित पवार गटाने बारामती नगरपरिषदेच्या नगराध्यक्षपदासाठी जाहीर सस्पेन्स संपवला आहे. बारामती सहकारी साखर कारखान्याचे माजी अध्यक्ष तथा माजी नगरसेवक सचिन सातव यांना घड्याळ चिन्हावर नगराध्यक्षपदाची उमेदवारी जाहीर करण्यात आली आहे. नितीन तावरे यांना मारहाणीनंतर तात्काळ रुग्णालयात दाखल करण्यात आले आहे. पोलिसांनी गुन्हा दाखल केला असून, निवडणूक संबंधित राजकीय वैमनस्यातून हा हल्ला झाल्याची प्राथमिक शक्यता वर्तवली जात आहे. पुढील तपास सुरू आहे.
