मुंबई : राष्ट्रवादी शरद पवार गटाचे अध्यक्ष शरद पवार यांची प्रकृती खालावली आहे. शरद पवार यांना बरं वाटत नसल्यामुळे त्यांनी आपले पुढचे चार दिवसांचे दौरे रद्द केले आहेत. ते सध्या पुण्यात आहेत. त्यांना नेमके काय होत आहे हे अद्याप समोर आलेले नाही.

गेल्या काही दिवसांपासून राज्यभरात आपल्या दौऱ्यांमुळे सक्रिय असलेल्या शरद पवार यांना अचानक आलेल्या अस्वस्थतेमुळे त्यांच्या चाहत्यांमध्ये आणि कार्यकर्त्यांमध्ये चिंतेचे वातावरण पसरले आहे. राष्ट्रवादीच्या कार्यकर्त्यांसाठी पवार हे प्रेरणास्थान असून त्यांच्या प्रकृतीविषयी सध्या तर्क-वितर्क लावले जात आहेत.

प्रकृती अस्वस्थ असूनही शरद पवार यांनी आपल्या लढाऊ वृत्तीचा परिचय संपूर्ण महाराष्ट्राला दिला आहे. विधानसभेतील अपयशानंतरही त्यांनी राज्यभर दौरे करत महायुती सरकारवर हल्लाबोल केला. त्यांचे सध्याचे दौरे पक्षासाठी नवी ऊर्जा देण्यासाठी महत्त्वाचे ठरत होते. मात्र, प्रकृती खालावल्यानंतर त्यांनी काही काळासाठी विश्रांती घेण्याचा निर्णय घेतल्याचे दिसत आहे.