मुंबईः नुकतेच देशाचे माजी केंद्रीय कृषी मंत्री शरद पवार यांच्या हस्ते राज्याचे उपमुख्यमंत्री एकनाथ शिंदे यांना दिल्लीत महादजी शिंदे राष्ट्र गौरव पुरस्कार देऊन सन्मानित करण्यात आले. या कार्यक्रमात शरद पवार यांनी एकनाथ शिंदे यांचे केलेले कौतुक ठाकरे गटाच्या चांगलचं जिव्हारी लागलं आहे. यावर ठाकरे गटाचे नेते संजय राऊत यांनी थेट शरद पवार यांना लक्ष्य केले. राऊत म्हणाले शरद पवारांनी या सत्कार सोहळ्याला जायला नको होतं. तसेच त्यांनी शिंदेंचा नाही तर अमित शहांचा सत्कार केल्याची घणाघाती टीका त्यांनी शरद पवार यांच्यावर केली. त्यांच्या टीकेनंतर आघाडीच्या आणि महायुतीच्या अनेक नेत्यांच्या प्रतिक्रिया समोर आल्या आहेत. आता राऊत यांच्या टीकेला शरद पवारांची प्रतिक्रिया समोर आली आहे.

पवारसाहेब हसले

या सत्कार सोहळ्यावर संजय राऊतांची टीका पाहून पवारसाहेब मिश्किलपणे हसले. आम्ही ६ जनपथला होतो. पवारसाहेबांनी कुठलीही प्रतिक्रिया दिली नाही. पण ते मिश्किल हसले, त्यांच्या चेहऱ्यावर एक स्मितहास्य होते, अशी प्रतिक्रिया शरद पवार गटाचे खासदार निलेश लंके यांनी एका वाहिनीला ही माहिती दिली. यामुळे राऊतांच्या टीकेवर शरद पवारांनी हसून पहिली प्रतिक्रिया दिली असल्याचे खासदार निलेश लंकेच्या माध्यमातून दिल्याचे समोर आले आहे.

शरद पवारांकडून एकनाथ शिंदेंच कौतुक

ठाणे, नवी मुंबई, मुंबई हा सगळा नागरी भाग आहे. अलीकडच्या ५० वर्षांमध्ये नागरी प्रश्नांसंबंधित जाण असलेला नेता कोण? याची जर माहिती घेतली तर कटाक्षाने एकनाथ शिंदे यांचं नाव घ्यावं लागेल. मग ते ठाणे असेल, ठाणे नगरपालिका असेल, नवी मुंबई असेल किंवा राज्याचे मुख्यमंत्री असतील. म्हणून एक योग्य दिशा देण्याचं काम त्यांनी सातत्याने केलं. हे करत असताना कुठलाही पक्षीय अभिनिवेश न ठेवता विविध क्षेत्रातील लोकांशी सुसंवाद ठेऊन राज्य आणि विशेषत: हा नागरी परिसर त्यांच्या प्रश्नांची सोडवणूक कशी होईल? यामध्ये लक्षकेंद्रित करण्याचं काम त्यांनी केलं, याची नोंद ही महाराष्ट्राच्या सार्वजनिक इतिहासामध्ये निश्चितपणाने राहिल. त्यामुळे त्यांचा सन्मान होतोय, याचा मला मनापासून आनंद आहे. तो सन्मान कसा होतोय? शिंदे यांचा पुरस्कार! शिंदेंना शिंद्यांचा पुरस्कार! तो ही जावई असलेल्या शिंदेंच्या हातून.. आनंद आहे.

शिंदेंच्या कौतुकावर संजय राऊतांची टीका

शरद पवारांनी शिंदेंचा नाही तर अमित शहांचा सत्कार केला अशी बोचरी टीका शरद पवार यांच्यावर केली. आम्हाला दिल्लीतलं राजकारण माहिती नाही पण आम्हालाही राजकारण कळतं पवारसाहेब अशी खोचक शब्दांत राऊतांनी आपली भावना व्यक्त केली. आम्हाला दिल्लीतलं राजकारण माहिती नाही आणि कळत नाही. पण आम्हालाही राजकारण कळतं पवारसाहेब. काही गोष्टी राजकारणात टाळायच्या असतात. महाराष्ट्राचे तुकडे पाडणाऱ्या, उद्योग पळवून नेणाऱ्या अमित शहांचा सत्कार आहे हा. शिंदे हे अमित शहांचे प्रतिक आहेत. महाराष्ट्र कमजोर केला त्यांना सन्मानित का करता? असा सवाल संजय राऊत यांनी उपस्थित केला.

आघाडीत बिघाडी?

शरद पवारांनी एकनाथ शिंदेंच केलेलं कौतुक ठाकरे गटाच्या चांगलेचं जिव्हारी लागलं आहे. मुळात महाविकास आघाडी तयार करण्यात शरद पवारांचे मोठे योगदान आहे. महाविकास आघाडीबाबत काही बोलायचे झाल्यास संजय राऊतांच्या तोंडी शरद पवारांचे नाव हे हमखास असते. शरद पवार देशाचे सर्वेाच्च नेते आहेत. वैगरे गोष्टी ते बोलत असतात. पण शरद पवारांनी शिंदेंचा केलेला सत्कार राऊतांच्या चांगलांच जिव्हारी लागला आणि ते या साऱ्यावर भडकले. त्यांनी माध्यमांना दिलेली प्रतिक्रिया अत्यंत सूचक होती. यामुळे आघाडीत बिघाडी तर होणार नाही ना अशी चर्चा आता राज्याच्या राजकारण केली जात आहे.