Supriya Sule post : राज्यसभेच्या ३७ जागांसाठी निवडणूक कार्यक्रम जाहीर झाला आहे. या निवडणुकीसाठी १६ मार्चला मतदान होणार आहे. यामध्ये महाराष्ट्रातील ७ राज्यसभा सदस्यांचा समावेश असून, ज्येष्ठ नेते शरद पवार देखील आहेत. त्यामुळे शरद पवार पुन्हा एकदा राज्यसभेवर जाणार असल्याच्या चर्चा रंगल्या आहेत. मात्र, आघाडीत यावर काय निर्णय होतो हे पाहणे महत्वाचे असणार आहे. या सगळ्यात शरद पवार यांच्या कन्या खासदार सुप्रिया सुळे यांनी सोशल मीडियावरून एक पोस्ट शेअर केली आहे. या पोस्टमध्ये त्यांनी एक जुना फोटो शेअर करत शरद पवारांच्या राजकीय कारकीर्दीवर भाष्य केले आहे. येत्या काही दिवसांमध्ये शरद पवार यांचा राज्यसभेचा कार्यकाळ संपणार असून, त्याअगोदर सुप्रिया सुळेंनी केलेली सोशल मीडिया पोस्ट चर्चेचा विषय ठरत आहे. या पोस्टमध्ये सुप्रिया सुळे यांनी शरद पवारांच्या राजकीय प्रवासाचा उल्लेख करत त्यांच्यासोबत असलेल्या कार्यकर्ते, जनता सर्वांचे आभार मानले आहेत. पोस्टमध्ये सुप्रिया सुळे नेमकं काय म्हणाल्या? “आदरणीय पवार साहेब यांची संसदीय कारकीर्द आज साठाव्या वर्षांत पदार्पण करीत आहे. या सहा दशकांच्या काळात कित्येक महत्त्वाच्या घडामोडींचे ते साक्षीदार आहेत. महाराष्ट्र विधानसभेचे सदस्य म्हणून त्यांनी सहा वेळा तर एकदा विधानपरिषदेचे सदस्य म्हणून शपथ घेतली. तब्बल सात वेळा ते लोकसभेत निवडून गेले तर दोन वेळा त्यांनी राज्यसभेत प्रतिनिधित्व केले आहे. सन १९६७ साली आजच्या दिवशी सुरू झालेला हा अविजीत प्रवास आजही अव्याहतपणे सुरु आहे. या संपूर्ण प्रवासात त्यांच्यासोबत त्यांचे जीवाभावाचे सोबती, कार्यकर्ते आणि सर्वात महत्त्वाचे म्हणजे मायबाप जनता ठामपणे उभे राहिले. जनतेने आदरणीय त्यांच्यावर अलोट प्रेम केले, प्रचंड विश्वास टाकला. या विश्वासाच्या बळावरच हा प्रवास शक्य झाला आहे. याबद्दल या सर्वांचे कृतज्ञतापूर्वक आभार. धन्यवाद.” असे पोस्टमध्ये सुप्रिया सुळे यांनी म्हटले आहे. आदरणीय पवार साहेब यांची संसदीय कारकीर्द आज साठाव्या वर्षांत पदार्पण करीत आहे. या सहा दशकांच्या काळात कित्येक महत्त्वाच्या घडामोडींचे ते साक्षीदार आहेत. महाराष्ट्र विधानसभेचे सदस्य म्हणून त्यांनी सहा वेळा तर एकदा विधानपरिषदेचे सदस्य म्हणून शपथ घेतली. तब्बल सात वेळा ते लोकसभेत… pic.twitter.com/rLkURdFVqV — Supriya Sule (@supriya_sule) February 22, 2026 महाराष्ट्रातून हे सात खासदार निवृत्त होणार शरद पवार, रामदास आठवले, फौजिया खान, रजनी पाटील, प्रियांका चतुर्वेदी, धैर्यशील पाटील, भागवत कराड हे सात खासदार राज्यसभेतून निवृत्त होणार आहेत. अशी असेल मतदान प्रक्रिया राज्यसभेच्या ३७ जागांसाठी अधिसूचना २६ फेब्रुवारी रोजी जारी केली जाईल. उमेदवारांना ५ मार्चपर्यंत नामांकन अर्ज दाखल करण्याची मुदत देण्यात आली आहे. ६ मार्च या दिवशी नामांकनांची पडताळणी होईल. ९ मार्चपर्यंत उमेदवार आपलं नामांकन मागं घेऊ शकतील. तर १६ मार्च रोजी सकाळी ९ ते सायंकाळी ४ वाजेपर्यंत मतदान प्रक्रिया पार पडणार आहे. हेही वाचा : Pakistan Afghanistan Air Strike : पाकिस्तानचा एअर स्ट्राईक; १७ जणांचा मृत्यू, अफगाणिस्तान आक्रमक
