मुंबई – अजित पवारांच्या नेतृत्वात राष्ट्रवादी कॉंग्रेसचा एक मोठा गट सत्ताधारी शिवसेना-भाजप आघाडीला जावून मिळाला आहे. यामुळे पक्षात दोन उभे गट पडलेत. अजित पवार यांनी शरद पवार याना न कळवता उपमुख्यमंत्री म्हणून शपथ घेतली आहे. मात्र, आता राष्ट्रवादी काँग्रेस पक्षाचे सर्वेसर्वा शरद पवार यांनी बंडखोरांना थेट वॉर्निंग दिली असल्याचं दिसून आलं आहे. “माझ्या परवानगीशिवाय माझे फोटो कोणी वापरू नयेत…’ असा सज्जड दमच त्यांनी दिला आहे. शरद पवार म्हणाले की, “माझे फोटो माझ्या परवानगीनेच वापरावेत. ज्यांनी माझ्या विचारांशी द्रोह केला, ज्यांच्याशी माझे आता वैचारिक मतभेद आहेत, जिवंतपणी माझा फोटो कुणी वापरावा हा माझा अधिकार आहे. त्यामुळे मी ज्या पक्षाचा राष्ट्रीय अध्यक्ष आहे, त्या पक्षाने माझा फोटो वापरवा. अन्य कुणीही माझा फोटो वापरू नये..’ अशी तंबीच शरद पवारांनी आज दिली. दरम्यान, शरद पवारांच्या या निर्णयावर रुपाली चाकणकर यांनी प्रतिक्रिया दिली आहे. “शरद पवार आमचे दैवत आहेत. साहेबांचे आशीर्वाद घेऊनच संघटनेपासूनचं राजकारण केलं. माझ्यासारख्या तमाम कार्यकर्त्यांनी शरद पवारांच्या मार्गदर्शनाखालीच समाजकरण केलंय. आजही ते आमचे मार्गदर्शक आहेत आणि दैवत आहेत. आमच्या मनात त्यांचं स्थान आहे. कार्यकर्ता म्हणून आम्हाला त्यांचा फोटो वापरण्याचा अधिकार आहे’. असं रुपाली चाकणकर म्हणाल्या.
