Shambhuraj Desai – महिनाभर अधिवेशनात देसाईंचा ‘मास्टरस्ट्रोक’ पाहायला मिळाला असून तब्बल ३०० तासांची धडाकेबाज सलामी देत त्यांनी सभागृहात आपली ठसठशीत छाप उमटवली. मुंबई येथे दि. २३ फेब्रुवारी ते २५ मार्च या कालावधीत पार पडलेल्या राज्याच्या अर्थसंकल्पीय अधिवेशनात पर्यटन, खनिकर्म मंत्री शंभूराज देसाई यांनी आपल्या प्रभावी कामगिरीने संपूर्ण अधिवेशन गाजवले. तब्बल महिनाभर चाललेल्या या अधिवेशनात त्यांनी सूक्ष्म नियोजन, संयमित नेतृत्व आणि अभ्यासपूर्ण मांडणीच्या जोरावर सरकारची बाजू ठामपणे सावरून धरली. सभागृहात विरोधकांकडून आक्रमक भूमिका घेतली जात असतानाही देसाई यांनी प्रत्येक प्रश्नाला नेमके, तथ्याधारित आणि नियमावलीच्या चौकटीत राहून उत्तर दिले. त्यामुळे अनेकदा विरोधकांची कोंडी झाली आणि सभागृहातील वातावरणावर त्यांचे नियंत्रण दिसून आले. या अधिवेशनात विधानसभा सभागृहात १९८ तास तर विधान परिषदेत १४४ तास सक्रिय कामकाज करत ना. देसाई यांनी तब्बल ३०० हून अधिक तासांची दमदार उपस्थिती नोंदवली. यामुळे पाटण मतदारसंघाचा आवाज अधिवेशनात ठळकपणे दणाणून गेला. शंभूराज देसाई, विधानसभा अधिवेशन उपमुख्यमंत्री एकनाथ शिंदे यांनी त्यांच्यावर गृहनिर्माण खात्याची अतिरिक्त जबाबदारी सोपवली होती. या दुहेरी जबाबदारीतही देसाई यांनी उत्कृष्ट समन्वय साधत कामकाजात कुठेही अडथळा येऊ दिला नाही. शिवसेना विधिमंडळ पक्षाची धुरा सांभाळत सत्ताधारी आमदारांमध्ये शिस्त आणि एकसूत्रता निर्माण करण्यात त्यांची भूमिका निर्णायक ठरली. अधिवेशनाच्या काळात विरोधकांनी विविध रणनीती आखून सरकारला घेरण्याचा प्रयत्न केला; मात्र ना. देसाई यांनी आपल्या अनुभवाच्या बळावर हे सर्व प्रयत्न निष्फळ ठरवले. गोंधळाच्या प्रसंगी सभागृहाचे नियंत्रण राखणे, महत्त्वाच्या विधेयकांवरील चर्चा मार्गी लावणे आणि सत्ताधारी आमदारांमध्ये समन्वय साधणे या सर्व आघाड्यांवर त्यांनी आपली ठसठशीत छाप उमटवली. शांत, संयमी पण ठाम शैली आणि शिस्तबद्ध नियोजनामुळे अधिवेशनातील कामकाजाचा वेग आणि दर्जा कायम राखण्यात त्यांचे योगदान मोलाचे ठरले. मुख्यमंत्री व उपमुख्यमंत्र्यांचा विश्वास संपादन करत त्यांनी गृहनिर्माण व नगरविकास यांसारख्या महत्त्वाच्या खात्यांची जबाबदारीही समर्थपणे पार पाडली. त्यामुळेच त्यांच्या कामगिरीचे सर्व स्तरांतून कौतुक होत आहे.
