Koynanagar: पाटण विधानसभा मतदारसंघातील दुष्काळी परिस्थितीमुळे आर्थिक अडचणीत सापडलेल्या गरीब, कष्टकरी आणि गरजू कुटुंबांना दिलासा देण्यासाठी राज्याचे पर्यटन मंत्री तथा पालकमंत्री शंभूराज देसाई यांनी पुढाकार घेतला असून शिवसेनेच्या माध्यमातून मतदारसंघात १५ हजार अन्नधान्य कीटचे वितरण करण्यात येत आहे. पहिल्या टप्प्यात पाच हजार कीटचे वाटप पूर्ण झाले आहे. दिवाळीपूर्वी आणखी दहा हजार कीटचे वितरण करण्यात येणार आहे.

पावसाने दिलेल्या खंडामुळे शेतीचे नुकसान झाले असून शेतकरी, शेतमजूर आणि रोजंदारीवर काम करणाऱ्या कुटुंबांसमोर उदरनिर्वाहाचा प्रश्न निर्माण झाला आहे. दिवाळीच्या पार्श्‍वभूमीवर या कुटुंबांना जीवनावश्यक वस्तूंचा आधार मिळावा, या उद्देशाने हा उपक्रम राबविण्यात येत आहे. कीटमध्ये तांदूळ, डाळ, साखर, खाद्यतेल, मीठ, मिरची पावडर, हळद, चहा पावडर, गरम मसाला, आटा, बिस्किटे, टूथपेस्ट आदी वस्तूंचा समावेश आहे. तारळे, चाफळ, म्हावशी, शिरळ, कोयना, नाटोशी, मारुल हवेली, ढेबेवाडी, काळगाव, कुंभारगाव आणि सुपने- तांबवे परिसरातील गावांमध्ये पदाधिकारी व कार्यकर्त्यांच्या माध्यमातून कीटचे वितरण सुरू आहे. डोंगराळ आणि दुर्गम भागातील गरजू कुटुंबांपर्यंत प्रत्यक्ष पोहोचून मदत देण्यावर भर दिला जात आहे.

करोना संकटाच्या काळातही देसाई यांनी हातावर पोट असलेल्या कुटुंबांसह पानटपरीचालक आणि वडाप व्यावसायिकांना अन्नधान्य कीटचे वाटप केले होते. यंदा दुष्काळी परिस्थितीतही त्यांनी मदतीचा हात पुढे केला आहे.