Stock Market : आठवड्याच्या पहिल्याच दिवशी भारतीय शेअर बाजारात जोरदार तेजी पाहायला मिळाली. रिलायन्स इंडस्ट्रीजच्या शेअरमध्ये झालेली मोठी वाढ, कच्च्या तेलाच्या दरातील घसरण आणि परदेशी गुंतवणूकदारांचा वाढता सहभाग यामुळे बाजाराला मोठी चालना मिळाली. सेन्सेक्स तब्बल 1,233 अंकांनी वाढला, तर निफ्टीने 23,440.80 अंकांची पातळी गाठत व्यवहार बंद केला.

30 कंपन्यांचा सेन्सेक्स 1,233.25 अंकांनी म्हणजेच 1.66 टक्क्यांनी वाढून 75,692.78 अंकांवर बंद झाला. दिवसभरातील हीच सर्वोच्च पातळी होती. राष्ट्रीय शेअर बाजाराचा निफ्टी 387.70 अंकांनी म्हणजेच 1.68 टक्क्यांनी वाढून 23,440.80 अंकांवर स्थिरावला.

रिलायन्सच्या शेअरमध्ये 11.64 टक्के वाढ –

रिलायन्स इंडस्ट्रीजच्या शेअरमध्ये 11.64 टक्क्यांची मोठी वाढ झाली. कंपनीने जुलै-सप्टेंबर तिमाहीत 29,550 कोटी रुपयांचा विक्रमी नफा नोंदवला आहे. मागील वर्षाच्या याच कालावधीच्या तुलनेत कंपनीच्या नफ्यात 33.8 टक्के वाढ झाली. तेल-रसायन व्यवसायातील चांगली कामगिरी आणि दूरसंचार व्यवसायातील वाढीचा कंपनीला फायदा झाला.

टाटा स्टील, अल्ट्राटेक सिमेंट, स्टेट बँक ऑफ इंडिया, एनटीपीसी आणि मारुती सुझुकीच्या शेअर्समध्येही वाढ झाली. मात्र, इन्फोसिस, कोटक महिंद्रा बँक, आयसीआयसीआय बँक आणि सन फार्माच्या शेअर्समध्ये घसरण झाली.

₹7 लाख कोटी वाढली गुंतवणूकदारांची संपत्ती –

एक व्यावसायिक दिवस आधी म्हणजेच ३० ऑक्टोबर २०२६ रोजी बीएसईवर सूचीबद्ध सर्व समभागांचे (शेअर्सचे) एकूण मार्केट कॅप ₹4,75,34,943.01 कोटी होते. आज म्हणजेच २ नोव्हेंबर २०२६ रोजी ते वाढून ₹4,82,34,006.43 कोटींवर पोहोचले. याचा अर्थ असा की आज गुंतवणूकदारांच्या भांडवलात ₹699,063.42 कोटींची वाढ झाली आहे.

कच्च्या तेलाच्या दरात मोठी घसरण –

जागतिक बाजारात कच्च्या तेलाच्या दरात मोठी घसरण झाली. ब्रेंट क्रूडचा दर 4.46 टक्क्यांनी घसरून 108.7 डॉलर प्रति बॅरलवर आला. त्यामुळे भारतीय कंपन्यांच्या खर्चाबाबत सकारात्मक वातावरण निर्माण झाले.

परदेशी संस्थात्मक गुंतवणूकदारांनी शुक्रवारी भारतीय शेअर बाजारात 3,598.54 कोटी रुपयांची शेअर्सची खरेदी केली. तसेच ऑक्टोबरमध्ये जीएसटी संकलन 23 टक्क्यांनी वाढून 2.31 लाख कोटी रुपयांपेक्षा जास्त झाले. सणासुदीच्या काळातील वाढलेली खरेदी यामागील प्रमुख कारण ठरले.

ऑक्टोबरमध्ये देशातील प्रवासी वाहनांची विक्रीही विक्रमी पातळीवर पोहोचली. वाहन कंपन्यांच्या विक्रीतील वाढ आणि देशांतर्गत अर्थव्यवस्थेबाबतचे सकारात्मक संकेत यामुळे गुंतवणूकदारांचा विश्वास वाढला.

आशियाई बाजारांमध्ये दक्षिण कोरियाचा कोस्पी, शांघाय एसएसई कॉम्पोझिट आणि हाँगकाँगचा हँगसेंग वाढीसह बंद झाले. मात्र, जपानचा निक्केई घसरणीसह बंद झाला. युरोपमधील प्रमुख बाजारांतही सकारात्मक वातावरण होते. शुक्रवारी अमेरिकेतील शेअर बाजार मात्र मोठ्या घसरणीसह बंद झाले.

शुक्रवारी सेन्सेक्स 308.49 अंकांनी वाढून 74,459.53, तर निफ्टी 116.35 अंकांनी वाढून 23,053.10 अंकांवर बंद झाला होता.