Stock Market : भारतीय शेअर बाजाराने शुक्रवारी (४ सप्टेंबर) चार दिवसांच्या घसरणीनंतर दमदार पुनरागमन केले. मेटल, खासगी बँकिंग आणि ऑईल-गॅस कंपन्यांच्या शेअर्समध्ये झालेल्या जोरदार खरेदीमुळे बीएसई सेन्सेक्स ३६२.५७ अंकांनी वाढून ७६,५१५.४३ अंकांवर बंद झाला. जागतिक बाजारातील सकारात्मक वातावरणाचाही बाजाराला आधार मिळाला.

सेन्सेक्समध्ये ०.४८ टक्क्यांची वाढ झाली. दिवसभरात निर्देशांकाने तब्बल ७३०.२८ अंकांची झेप घेत ७६,८८३.१४ अंकांची उच्चांकी पातळी गाठली होती. मात्र, त्यानंतर काही प्रमाणात नफावसुली झाल्याने अंतिम वाढ कमी झाली. सेन्सेक्समधील ३० पैकी २० कंपन्यांचे शेअर्स वधारले, तर १० शेअर्स घसरले.

निफ्टी २४ हजारांवर पोहोचून पुन्हा खाली –

एनएसई निफ्टीमध्ये २४.२५ अंकांची म्हणजेच ०.१० टक्क्यांची वाढ झाली आणि तो २३,८९७.७० अंकांवर स्थिरावला. दिवसभर निफ्टीने सकारात्मक व्यवहार केला. त्याने २४ हजारांचा टप्पा ओलांडत २४,००५.७५ अंकांची उच्चांकी पातळी गाठली. मात्र, नव्याने सुरू करण्यात आलेल्या क्लोजिंग ऑक्शन सत्रात झालेल्या विक्रीमुळे निफ्टीची वाढ मर्यादित राहिली.

टाटा स्टील, रिलायन्ससह हे शेअर्स वधारले –

सेन्सेक्समधील टाटा स्टील, रिलायन्स इंडस्ट्रीज, बजाज फायनान्स, ट्रेंट, अदानी पोर्ट्स, एचडीएफसी बँक, कोटक महिंद्रा बँक, अल्ट्राटेक सिमेंट, टायटन, महिंद्रा अँड महिंद्रा आणि हिंदुस्तान युनिलिव्हर हे प्रमुख तेजीतील शेअर्स ठरले.

दुसरीकडे भारती एअरटेल, एचसीएल टेक्नॉलॉजीज, इटरनल, एशियन पेंट्स, टीसीएस, टेक महिंद्रा, सन फार्मास्युटिकल्स, आयसीआयसीआय बँक, भारत इलेक्ट्रॉनिक्स आणि मारुती सुझुकी इंडिया यांच्या शेअर्समध्ये घसरण झाली.

फेडच्या व्याजदराच्या चिंतेत घट –

जिओजित इन्व्हेस्टमेंट्सचे संशोधन प्रमुख विनोद नायर यांच्या मते, अमेरिकन फेडकडून तातडीने व्याजदरवाढ होण्याची शक्यता कमी झाल्याने भारतीय बाजारात ‘रिलीफ रॅली’ पाहायला मिळाली. मात्र, उच्च पातळीवर नफावसुली आणि मध्य-पूर्वेतील कायम असलेल्या भू-राजकीय तणावामुळे बाजारातील तेजी मर्यादित राहिली.

व्यापक बाजारातही शेअर आणि क्षेत्रनिहाय खरेदी दिसून आली. स्मॉल-कॅप निर्देशांकांनी दिवसभरातील व्यवहारात नवा सार्वकालिक उच्चांक गाठला. मजबूत कंपन्यांचे निकाल, अर्थव्यवस्थेची लवचिक वाढ आणि देशांतर्गत मागणी यामुळे गुंतवणूकदारांचा विश्वास कायम असल्याचे नायर यांनी सांगितले.

आशियाई बाजारातही तेजी –

जागतिक बाजारातील सकारात्मक वातावरणाचा भारतीय बाजाराला फायदा झाला. हँग सेंग १.७४ टक्के, कोस्पी १.६४ टक्के आणि निक्केई २२५ १.२८ टक्क्यांनी वधारला. मात्र, शांघाय एसएसई कम्पोझिट ०.३० टक्क्यांनी घसरला. युरोपियन बाजारांमध्ये बहुतांश निर्देशांक स्थिर होते. गुरुवारी अमेरिकेतील शेअर बाजार १ टक्क्यांहून अधिक वाढून बंद झाले होते.

दरम्यान, आंतरराष्ट्रीय तेल बाजारात ब्रेंट क्रूड ०.४० टक्क्यांनी घसरून ९५.१४ डॉलर प्रति बॅरलवर आले.

विदेशी गुंतवणूकदारांची विक्री सुरूच –

विदेशी संस्थात्मक गुंतवणूकदारांनी गुरुवारी भारतीय शेअर बाजारातून २,३४५.८७ कोटी रुपयांचे शेअर्स विकले. मात्र, देशांतर्गत संस्थात्मक गुंतवणूकदारांनी ४,९७७.४६ कोटी रुपयांची खरेदी केली.

गुरुवारी सेन्सेक्स ४१७.४९ अंकांनी घसरून ७६,१५२.८६ अंकांवर, तर निफ्टी ४१ अंकांनी घसरून २३,८७३.४५ अंकांवर बंद झाला होता. या घसरणीमुळे दोन्ही निर्देशांकांचा सलग चार दिवसांचा घसरणीचा प्रवास शुक्रवारी खंडित झाला.