Stock Market : मध्यपूर्वेतील वाढत्या तणावामुळे, कच्च्या तेलाच्या किमतींमध्ये झालेली वाढ आणि अमेरिका-इराण युद्धबंदीबाबतची अनिश्चितता यामुळे भारतीय शेअर बाजारात सोमवारी सलग चौथ्या सत्रात घसरण नोंदवली गेली. एफएमसीजी, वित्तीय आणि वाहन क्षेत्रातील समभागांवरील विक्रीचा दबाव वाढल्याने सेन्सेक्स 508 अंकांनी घसरला.

मुंबई शेअर बाजाराचा 30 समभागांचा सेन्सेक्स 508.40 अंकांनी अर्थात 0.68 टक्क्यांनी घसरून 74,267.34 अंकांवर बंद झाला. दिवसभरात निर्देशांकाने 75,367.93 अंकांचा उच्चांक आणि 74,203.68 अंकांचा नीचांक गाठला. व्यवहारादरम्यान सेन्सेक्समध्ये तब्बल 1,164 अंकांची चढ-उतार दिसून आली.

राष्ट्रीय शेअर बाजाराचा निफ्टी निर्देशांकही 165.15 अंकांनी म्हणजे 0.70 टक्क्यांनी घसरून 23,382.60 अंकांवर स्थिरावला.

कोणते शेअर्स वाढले – घसरले ?

सेन्सेक्समधील प्रमुख घसरणाऱ्या समभागांमध्ये हिंदुस्तान युनिलिव्हर, आयटीसी, एनटीपीसी, महिंद्रा अँड महिंद्रा, कोटक महिंद्रा बँक आणि बजाज फायनान्स यांचा समावेश होता. दुसरीकडे टेक महिंद्रा, इन्फोसिस, टाटा कन्सल्टन्सी सर्व्हिसेस (टीसीएस), इंटरग्लोब एव्हिएशन, एचसीएल टेक आणि टाटा स्टील या समभागांनी वाढ नोंदवली.

ब्रेंट क्रूड तेलाच्या किमती वाढल्या –

आंतरराष्ट्रीय बाजारात ब्रेंट क्रूड तेलाच्या किमती 3.34 टक्क्यांनी वाढून प्रति बॅरल 94.16 डॉलरवर पोहोचल्या. अमेरिका आणि इराण यांच्यातील संघर्ष चौथ्या महिन्यात प्रवेश केल्याने तसेच होर्मुझ सामुद्रधुनी अद्याप बंद असल्याने गुंतवणूकदारांमध्ये चिंतेचे वातावरण निर्माण झाले आहे.

तज्ज्ञांचे मत  –

‘एनरिच मनी’चे मुख्य कार्यकारी अधिकारी पोनमुडी आर. यांनी सांगितले की, मध्यपूर्वेतील संघर्षामुळे जागतिक स्थैर्याबाबत चिंता वाढली असून बाजारात ‘रिस्क-ऑफ’ वातावरण निर्माण झाले आहे. सुरुवातीला निफ्टीने सकारात्मक सुरुवात केली होती, मात्र राजनैतिक तोडग्याच्या आशा क्षीण झाल्याने विक्रीचा दबाव वाढला.

परदेशी गुंतवणूकदारांनी पैसे काढून घेतले –

दरम्यान, परदेशी संस्थात्मक गुंतवणूकदारांनी (एफआयआय) शुक्रवारी भारतीय शेअर बाजारातून 21,105.86 कोटी रुपयांची गुंतवणूक काढून घेतल्याची माहिती शेअर बाजाराच्या आकडेवारीतून समोर आली.

‘जिओजित इन्व्हेस्टमेंट्स’चे संशोधन प्रमुख विनोद नायर यांनी सांगितले की, अमेरिकेच्या हवाई कारवाया तसेच इस्रायल-लेबनॉन सीमावर्ती संघर्षामुळे बाजारातील जोखीम वाढली आहे. मात्र संघर्षाचा कालावधी वाढल्याने निकट भविष्यात राजनैतिक तोडगा निघण्याची शक्यता गुंतवणूकदारांकडून व्यक्त केली जात आहे.

आंतरराष्ट्रीय बाजारातील स्थिती –

आशियाई बाजारांमध्ये दक्षिण कोरियाचा कोस्पी, जपानचा निक्केई आणि हाँगकाँगचा हँगसेंग निर्देशांक वाढीसह बंद झाले, तर चीनचा शांघाय कंपोझिट निर्देशांक घसरला. युरोपीय बाजारांमध्ये मात्र सकारात्मक वातावरण दिसून आले. याआधी शुक्रवारी सेन्सेक्स 1,092.06 अंकांनी घसरला होता, तर निफ्टीमध्ये 359.40 अंकांची घसरण झाली होती.

डॉलरच्या तुलनेत रुपया १० पैशांनी घसरला; ९४.९५ वर बंद

अमेरिका-इराणमधील वाढता भूराजकीय तणाव आणि कच्च्या तेलाच्या किमतीत झालेल्या वाढीमुळे सोमवारी आंतरबँकीय परकीय चलन बाजारात रुपया १० पैशांनी घसरून ९४.९५ (तात्पुरता) वर बंद झाला. अमेरिकन डॉलरची मजबूती आणि इस्रायल-लेबनॉन तणावामुळे जागतिक स्तरावर चिंतेचे वातावरण आहे. दिवसभरात रुपयाने ९४.७३ चा उच्चांक आणि ९५.०३ चा नीचांक गाठला.