Stock Market: भारतीय शेअर बाजारात आज (२४ मार्च) चौफेर तेजी पाहायला मिळाली. जागतिक बाजारातील सकारात्मक संकेत आणि भू-राजकीय तणाव निवळल्याचे चित्र दिसत असल्याने गुंतवणूकदारांनी खरेदीचा धडाका लावला. यामुळे अवघ्या एका दिवसात गुंतवणूकदारांच्या संपत्तीत ७.६२ लाख कोटी रुपयांची वाढ झाली आहे. बाजारातील आजची स्थिती (Closing Status) दिवसभराच्या व्यवहारानंतर मुंबई शेअर बाजाराचा निर्देशांक सेन्सेक्स १३७२.०६ अंकांनी (१.८९%) वधारून ७४,०६८.४५ वर बंद झाला. दुसरीकडे, राष्ट्रीय शेअर बाजाराचा निर्देशांक निफ्टी ३९९.७५ अंकांनी (१.७८%) वाढून २२,९१२.४० वर स्थिरावला. विशेष म्हणजे, इंट्रा-डे व्यवहारात सेन्सेक्सने १७९३ अंकांची झेप घेत ७४,४८९ चा स्तर गाठला होता, तर निफ्टी २३,००० च्या पार पोहोचला होता. बीएसई (BSE) वर सूचीबद्ध असलेल्या सर्व कंपन्यांचे एकूण मार्केट कॅप काल (२३ मार्च) ₹४,१५,२१,६२९.८२ कोटी होते. आज बाजार बंद होताना हे भांडवल वाढून ₹४,२३,१६,८१३.८९ कोटींवर पोहोचले. परिणामी, गुंतवणूकदारांच्या खिशात एका दिवसात तब्बल ७.६२ लाख कोटी रुपये पडले आहेत. सेन्सेक्सचे २८ शेअर्स वधारले: सेन्सेक्समधील ३० पैकी २८ समभाग हिरव्या निशाण्यावर बंद झाले. यामध्ये इंडिगो, एलअँडटी आणि एटर्नल या शेअर्समध्ये मोठी तेजी दिसून आली. बँक निफ्टी अडीच टक्क्यांहून अधिक वाढीसह बंद झाला. मिडकॅप आणि स्मॉलकॅप शेअर्समध्येही जोरदार खरेदी झाली. आज एकूण ४,४३१ शेअर्समध्ये व्यवहार झाले. त्यापैकी २,९६८ शेअर्स वाढले, तर १,२९५ शेअर्समध्ये घसरण झाली. १६८ शेअर्सच्या भावात कोणताही बदल झाला नाही. ४४ शेअर्सनी वर्षभरातील उच्चांकी (52-week high) स्तर गाठला, तर १० शेअर्सला अप्पर सर्किट लागले. बाजारातील भीती दर्शवणारा ‘इंडिया विक्स’ ६.८१ टक्क्यांनी घसरून २४.९१ वर आला आहे, जो गुंतवणूकदारांचा आत्मविश्वास वाढत असल्याचे संकेत देतो. राम नवमीमुळे एक्सपायरीमध्ये बदल – गुरुवार, २६ मार्च रोजी राम नवमी निमित्त शेअर बाजार बंद राहणार आहे. त्यामुळे सेन्सेक्सच्या इंडेक्स डेरिव्हेटिव्ह कॉन्ट्रॅक्ट्सची एक्सपायरी आता एक दिवस आधी म्हणजेच बुधवार, २५ मार्च रोजी होणार आहे. या बदलाचा परिणाम आजच्या बाजारातील हालचालींवर स्पष्टपणे दिसून आला. आजचे टॉप गेनर्स: इंडिगो, एलअँडटी, एटर्नल. आजचे टॉप लूझर्स: पॉवरग्रिड, एसबीआय.
