Stock Market: दूरसंचार (telecom), औषधनिर्मिती (Pharma) आणि खासगी बँकिंग क्षेत्रातील शेअर्समध्ये झालेल्या जोरदार खरेदीमुळे गुरुवारी शेअर बाजार सलग दुसऱ्या दिवशी तेजीत बंद झाला. बीएसई सेन्सेक्सने तब्बल ७८९.७४ अंकांची उसळी घेत ७५,३९८.७२ वर झेप घेतली, तर एनएसई निफ्टी २७७ अंकांनी वधारून २३,६८९.६० वर बंद झाला.

दिवसभरातील चढ-उताराच्या व्यवहारात सेन्सेक्सने सुरुवातीला सकारात्मक सुरुवात केली होती. मात्र, सकाळच्या सत्रात तो काही काळ घसरून नकारात्मक पातळीवर गेला. त्यानंतर दूरसंचार आणि बँकिंग शेअर्समध्ये जोरदार खरेदी झाल्याने निर्देशांकाने पुनरागमन करत दिवसातील उच्चांक ७५,६८१.८८ गाठला होता.

भारती एअरटेल सर्वाधिक ५ टक्क्यांहून अधिक वाढ – (Stock Market)

सेन्सेक्समधील 30 शेअर्समध्ये भारती एअरटेलने सर्वाधिक ५ टक्क्यांहून अधिक वाढ नोंदवली. कंपनीचे वार्षिक उत्पन्न प्रथमच २ लाख कोटी रुपयांच्या पुढे गेल्याने गुंतवणूकदारांचा प्रतिसाद मिळाला. इटरनलमध्ये ३.३२ टक्के वाढ झाली, तर एचडीएफसी बँकेच्या समभागांनी २.६७ टक्क्यांची भरारी घेत बाजाराला मोठा आधार दिला.

याशिवाय अदानी पोर्ट्स, सन फार्मा, बजाज फायनान्स, महिंद्रा अँड महिंद्रा, एनटीपीसी, कोटक महिंद्रा बँक, टायटन, ट्रेंट, अल्ट्राटेक सिमेंट, आयटीसी आणि स्टेट बँक ऑफ इंडिया हे समभागही वधारले.

दुसरीकडे, इन्फोसिस, टेक महिंद्रा, एचसीएल टेक्नॉलॉजीज, टीसीएस, हिंदुस्तान युनिलिव्हर, अॅक्सिस बँक आणि मारुती सुझुकी इंडिया यांच्या समभागांमध्ये घसरण झाली.

गुंतवणूकदारांचा आत्मविश्वास वाढला – (Stock Market)

जिओजित इन्व्हेस्टमेंट्सचे संशोधन प्रमुख विनोद नायर यांनी सांगितले की, रुपया विक्रमी नीचांकीवर पोहोचला आणि कच्च्या तेलाच्या किंमती उच्च पातळीवर असतानाही भारतीय शेअर बाजाराने मजबूत पुनरागमन केले. रुपयातील घसरण रोखण्यासाठी सरकारकडून उपाययोजनांची शक्यता असल्याने गुंतवणूकदारांचा आत्मविश्वास वाढल्याचे त्यांनी नमूद केले.

आशियाई बाजारांमध्ये चीनचा शांघाय कंपोझिट आणि जपानचा निक्केई निर्देशांक घसरले, तर दक्षिण कोरियाचा कोस्पी वाढीसह बंद झाला. युरोपीय बाजारातही सकारात्मक वातावरण दिसून आले.

ब्रेंट क्रूडचा दर प्रति बॅरल १०६.४८ डॉलरवर –

दरम्यान, जागतिक बाजारातील ब्रेंट क्रूडचा दर जवळपास १ टक्क्यांनी वाढून प्रति बॅरल १०६.४८ डॉलरवर पोहोचला आहे. उच्च कच्चे तेल दर आणि परदेशी गुंतवणूकदारांच्या विक्रीमुळे रुपया डॉलरच्या तुलनेत ९५.७३ या विक्रमी नीचांकी पातळीवर घसरला आहे.

बुधवारी परदेशी संस्थात्मक गुंतवणूकदारांनी ४,७०३.१५ कोटी रुपयांची विक्री केली, तर देशांतर्गत संस्थात्मक गुंतवणूकदारांनी ५,८६९.०५ कोटी रुपयांची खरेदी केल्याचे शेअर बाजाराच्या आकडेवारीतून स्पष्ट झाले आहे.