Stock market : सेन्सेक्समध्ये 990 अंकांची उसळी; मारुती सुझुकीच्या शेअरमध्ये जोरदार तेजी
Stock market : भारतीय शेअर बाजारात 19 नोव्हेंबरला जोरदार तेजी. सेन्सेक्स 989.94 अंकांनी वाढून 83,021 वर, तर निफ्टी 25,514 वर बंद. वाहन आणि बँकिंग शेअर्समध्ये मोठी खरेदी.

Stock market : भारतीय शेअर बाजारात बुधवारी झालेल्या घसरणीनंतर गुरुवारी (19 नोव्हेंबर) जोरदार तेजी पाहायला मिळाली. वाहननिर्मिती आणि बँकिंग क्षेत्रातील कंपन्यांच्या शेअर्समध्ये मोठ्या प्रमाणात खरेदी झाल्याने सेन्सेक्स जवळपास 990 अंकांनी वधारला. तर निफ्टीने पुन्हा 25,500 अंकांचा टप्पा पार केला. परदेशी गुंतवणूकदारांकडून सुरू असलेली खरेदी आणि कच्च्या तेलासह काही औद्योगिक वस्तूंच्या किमतीतील नरमाई यामुळे बाजाराला आधार मिळाला.
सेन्सेक्स 83 हजारांवर, निफ्टी 25,514 वर
मुंबई शेअर बाजाराचा (बीएसई) 30 कंपन्यांचा सेन्सेक्स 989.94 अंकांनी म्हणजेच 1.21 टक्क्यांनी वाढून 83,021.75 अंकांवर बंद झाला. व्यवहारादरम्यान सेन्सेक्सने 1,012.06 अंकांची वाढ नोंदवत 83,043.87 अंकांची पातळी गाठली होती.
राष्ट्रीय शेअर बाजाराचा (एनएसई) 50 कंपन्यांचा निफ्टी 286.35 अंकांनी म्हणजेच 1.14 टक्क्यांनी वाढून 25,514.30 अंकांवर स्थिरावला.
मारुती सुझुकीच्या शेअरमध्ये सर्वाधिक तेजी
सेन्सेक्समधील कंपन्यांमध्ये मारुती सुझुकीचा शेअर सर्वाधिक 7.58 टक्क्यांनी वाढला. महिंद्रा अँड महिंद्राच्या शेअरमध्ये 4.78 टक्के, अॅक्सिस बँकेत 4.38 टक्के, हिंदुस्तान युनिलिव्हरमध्ये 4.22 टक्के, भारत इलेक्ट्रॉनिक्समध्ये 2.12 टक्के आणि स्टेट बँक ऑफ इंडियाच्या शेअरमध्ये 2.11 टक्के वाढ झाली.
मात्र, इन्फोसिस, टाटा कन्सल्टन्सी सर्व्हिसेस (टीसीएस), टेक महिंद्रा, एचसीएल टेक्नॉलॉजीज आणि इंटरग्लोब एव्हिएशन या कंपन्यांच्या शेअर्समध्ये घसरण झाली.
परदेशी गुंतवणूकदारांची खरेदी, कच्च्या तेलाच्या किमतींचाही आधार
जिओजित इन्व्हेस्टमेंट्सचे संशोधन प्रमुख विनोद नायर यांच्या मते, परदेशी गुंतवणूकदारांकडून सुरू असलेली खरेदी आणि तांबे, कच्चे तेल यांसारख्या वस्तूंच्या किमतीतील नरमाई यामुळे भारतीय बाजाराला आधार मिळाला. कच्च्या तेलाच्या किमती कमी झाल्याने महागाई वाढण्याची आणि देशाच्या परकीय व्यापारातील तूट वाढण्याची चिंता काही प्रमाणात कमी झाली आहे. तांबे आणि अॅल्युमिनियमच्या किमती कमी झाल्याने वाहन कंपन्यांच्या उत्पादन खर्चात दिलासा मिळण्याची अपेक्षा आहे.
परदेशी संस्थात्मक गुंतवणूकदारांनी बुधवारी भारतीय शेअर बाजारात 5,866.78 कोटी रुपयांची निव्वळ खरेदी केली.
जागतिक बाजारात संमिश्र चित्र –
आशियाई बाजारांमध्ये दक्षिण कोरियाचा कोस्पी आणि जपानचा निक्केई वाढीसह बंद झाले. मात्र, चीनचा शांघाय आणि हाँगकाँगचा हँगसेंग घसरणीसह बंद झाला. युरोपमधील प्रमुख बाजारांमध्ये तेजीचे वातावरण होते.
अमेरिकेतील बुधवारी झालेल्या व्यवहारात डाऊ जोन्स 1.11 टक्क्यांनी आणि एस अँड पी 500 निर्देशांक 0.23 टक्क्यांनी घसरला. तर नॅस्डॅक 0.42 टक्क्यांनी वाढला. आंतरराष्ट्रीय बाजारात ब्रेंट कच्च्या तेलाचा दर 0.61 टक्क्यांनी वाढून प्रति बॅरल 92.51 डॉलर झाला.
दरम्यान, बुधवारी भारतीय बाजारात मोठी घसरण झाली होती. सेन्सेक्स 500.38 अंकांनी घसरून 82,031.81 अंकांवर, तर निफ्टी 159.45 अंकांनी घसरून 25,227.95 अंकांवर बंद झाला होता. या घसरणीनंतर गुरुवारी बाजाराने जोरदार पुनरागमन केले.





