Stock Market Closing On 16 August 2024: भारतीय शेअर बाजार आणि त्यातील गुंतवणूकदारांसाठी आठवड्याचे शेवटचे ट्रेडिंग सत्र चांगले राहिले. देशी-विदेशी गुंतवणूकदारांनी खरेदी केल्यामुळे बाजारात मोठी वाढ झाली. आयटी, बँकिंग आणि ऑटो शेअर्समध्ये गुंतवणूकदारांनी जोरदार खरेदी केल्याचे दिसून आले. आजच्या व्यवहाराअंती सेन्सेक्स 1330 अंकांच्या वाढीसह 80,000 च्या वर 80,437 अंकांवर बंद झाला. तर राष्ट्रीय शेअर बाजाराचा निफ्टी 400 अंकांच्या उसळीसह 24,541 अंकांवर बंद झाला.

मिड-कॅप निर्देशांक 1100 अंकांनी वाढला –

सेन्सेक्समधील 30 समभागांपैकी 29 समभाग वाढीसह बंद झाले आणि एक समभाग तोट्यासह बंद झाला. तर निफ्टी 50 समभागांपैकी 47 वाढीसह आणि 3 तोट्यासह बंद झाले. बाजारात आजच्या सत्रात मिड कॅप आणि स्मॉल कॅप शेअर्समध्येही जोरदार खरेदी दिसून आली. निफ्टीच्या मिड-कॅप निर्देशांकात 1100 अंकांची वाढ झाली आणि निर्देशांक 1109 अंकांच्या उसळीसह 57,656 अंकांवर बंद झाला. स्मॉल-कॅप समभागांमध्येही वाढ झाली आणि निफ्टी स्मॉल-कॅप 100 निर्देशांक 350 अंकांच्या उसळीसह 18,437 अंकांवर बंद झाला.

वाढलेले – घसरलेले शेअर्स –

आजच्या व्यवहारात टेक महिंद्राचे समभाग 4.02 टक्के, टाटा मोटर्स 3.47 टक्के, महिंद्रा अँड महिंद्रा 3.45 टक्के, टीसीएस 2.91 टक्के, एचसीएल टेक 2.65 टक्के, अल्ट्राटेक सिमेंट 2.60 टक्के, टाटा स्टील 2.29 टक्के, आयटीसी 2.17 टक्के, आयसीआयसीआय बँक 2.17 टक्के, अदानी पोर्ट्स 2.07 टक्क्यांच्या वाढीसह बंद झाले. घसरलेल्या समभागांमध्ये मॅक्स फायनान्शियल 2.21 टक्क्यांनी, अरबिंदो फार्मा 1.12 टक्क्यांनी, व्होल्टास 0.98 टक्क्यांनी, पीएनबी 0.47 टक्क्यांनी, SRF 0.42 टक्क्यांनी आणि अपोलो टायर्स 0.26 टक्क्यांनी घसरून बंद झाले.

गुंतवणूकदारांच्या संपत्तीत 7 लाख कोटींची वाढ –

शेअर बाजारातील नेत्रदीपक वाढीमुळे गुंतवणूकदारांच्या संपत्तीत मोठी वाढ झाली आहे. बीएसईवर सूचीबद्ध समभागांचे मार्केट कॅप पुन्हा 451.54 लाख कोटी रुपयांवर बंद झाले आहे, जे मागील सत्रात 444.29 लाख कोटी रुपये होते. म्हणजेच आजच्या सत्रात गुंतवणूकदारांना 7.25 लाख कोटी रुपयांचा नफा झाला आहे.