Mumbai Crime news : भांडुपमध्ये खळबळ ! काँग्रेस नगरसेविकेकडून महिलेचे अपहरण, अनैतिक संबधाच्या संशयातून कृत्य

Mumbai Crime news : मुंबईच्या राजकीय वर्तुळात खळबळ उडवणारी घटना भांडुप परिसरातून समोर आली आहे. काँग्रेसच्या ज्येष्ठ नगरसेविका आशा कोपरकर आणि त्यांच्या कुटुंबीयांविरोधात भांडुप पोलीस ठाण्यात अपहरण, मारहाण आणि जीवे मारण्याची धमकी दिल्याप्रकरणी गंभीर गुन्हा दाखल करण्यात आला आहे.

मिळालेल्या माहितीनुसार, काँग्रेस नेते सुरेश कोपरकर यांचे एका महिलेसोबत अनैतिक संबंध असल्याचा संशय आशा कोपरकर आणि त्यांच्या कुटुंबीयांना होता. या संशयातून संबंधित महिलेचे अपहरण करून तिला बेदम मारहाण करण्यात आल्याचा आरोप पीडित महिलेने आपल्या तक्रारीत केला आहे. तसेच तिला जीवे मारण्याची धमकी देण्यात आल्याचाही आरोप करण्यात आला आहे.

या प्रकरणात नगरसेविका आशा कोपरकर, त्यांच्या दोन मुली, जावई, मुलगा आणि खासगी कार चालकाविरोधात गुन्हा नोंदवण्यात आला आहे. आशा कोपरकर या भांडुप प्रभाग क्रमांक ११० मधील काँग्रेसच्या नगरसेविका असून त्या काँग्रेस नेते सुरेश कोपरकर यांच्या पत्नी आहेत.

घटनेनंतर पीडित महिलेने थेट भांडुप पोलीस ठाणे गाठत तक्रार दाखल केली. पोलिसांनी तक्रारीची गंभीर दखल घेत विविध कलमांखाली गुन्हा नोंदवला असून प्रकरणाचा पुढील तपास सुरू आहे.

दरम्यान, या प्रकरणात अद्याप कोणालाही अटक करण्यात आलेली नसल्याची माहिती समोर आली आहे. मात्र, या घटनेमुळे राजकीय वर्तुळात मोठी खळबळ उडाली आहे.

हेही वाचा : Ravi Mohan : अन्.. अभिनेता ढसाढसा रडला; मोठा निर्णय घेतल्याने चाहत्यांना धक्का, नेमकं प्रकरण काय?