Rickshaw-Taxi and Fare Increase |  महाराष्ट्र राज्य मार्ग परिवहन मंडळाने वाहतूक सेवांच्या भाडेदरात वाढ करण्याचा निर्णय घेतला. त्यानुसार एसटीनं 14.95 टक्के भाडेवाढ केल्याने सर्वसामान्यांचा प्रवास महागला आहे. यातच भर म्हणून आता मुंबई महानगर क्षेत्रात रिक्षा आणि टॅक्सीच्या भाडेवाढीचा निर्णय घेण्यात आला आहे. त्यामुळे सर्वसामान्यांच्या खिशाला कात्री बसणार आहे. रिक्षा आणि टॅक्सीच्या मूळ भाड्यात 3 रुपयांची वाढ करण्यात आली आहे. येत्या 1 फेब्रुवारीपासून ऑटो रिक्षा व टॅक्सीची भाडेवाढ होणार आहे.

ऑटो रिक्षा आणि टॅक्सी यूनियनकडून दोन वर्षाहून अधिक काळानंतर दरवाढ झाल्याचं सांगण्यात आलं आहे. इंधन आणि सीएनजीच्या दरात सातत्याने वाढ होत असल्याने याचा फटका चालकांना बसत आहेत. याशिवाय अॅप आधारित रिक्षा आणि टॅक्सी कंपन्यांमुळेही मोठे नुकसान सहन करावे लागत आहे. यामुळे भाडेवाढ करावी लागत असल्याचे यूनियनकडून सांगण्यात आलं. Rickshaw-Taxi and Fare Increase |

किती दरवाढ होणार?  

ऑटोरिक्षाचं दीड किलोमीटर अंतरामध्ये मूळ भाडं 23 रुपयांवरुन 26 रुपये झालं आहे. तर, मुंबईतील टॅक्सीचं भाडं 28 रुपयांवरुन 31 रुपये झालं आहे. तर, कूल कॅबच्या भाड्यात 8 रुपयांची वाढ होऊन ते 40 रुपयांवरुन 48 रुपये झालं आहे. शेअर टॅक्सीचं भाडं देखील 10 रुपयांवरुन 12 रुपये होईल. दीड किलोमीटर अंतरानंतर प्रवाशांना प्रत्येक किलोमीटरसाठी अधिकची रक्कम मोजावी लागणार आहे. एसटी, रिक्षा आणि टॅक्सीच्या भाडेवाढीनं प्रवाशांनी संताप व्यक्त केला आहे.

एसटीची भाडेवाढ आजपासून लागू

तर महाराष्ट्र राज्य मार्ग परिवहन महामंडलाने वाहतूक सेवांच्या भाडेदरात 14.95 टक्के वाढ करण्यास मान्यता दिली आहे. ही भाडेवाढ आजपासून लागू केली जाणार आहे. याआधी 26 ऑक्टोबर 2021 रोजी भाडेवाढ करण्यात आली होती. Rickshaw-Taxi and Fare Increase |

दरम्यान, मुख्यमंत्री देवेंद्र फडणवीस यांनी राज्यातील सर्व विभागांना 100 दिवसांचे नियोजन करून सादरीकरण करण्याच्या सूचना दिल्या होत्या. त्यानुसार एसटी महामंडळाने स्वमालकीच्या 5 हजार नव्या बस खरेदी करणे, पहिल्या चार महिन्यात 20 चार्जिंग स्टेशन कार्यान्वित करणे आणि तिकीट दरात 14.95 टक्के भाडेवाढ करणे, अशा प्रमुख मुद्द्यांचा समावेश केला होता. त्यानुसार आता भाडेवाढ करण्याबाबत निर्णय झाला आहे.

हेही वाचा: 

आनंदाची बातमी ! महावितरणकडून वीजदर कपातीचा प्रस्ताव सादर ; वाचा नवीन दर कधीपासून लागू होणार?