कराड – बेलवडे हवेली (ता. कराड) गावच्या हद्दीत पुणे-बेंगलोर महामार्गावर भारत विद्या मंदिर व कनिष्ठ महाविद्यालय वाघोली (ता. कोरेगाव) या शालेय सहलीच्या एसटी बसचा आणि कंटेनरचा भीषण अपघात झाला. बुधवार दि. 18 रोजी सकाळी 6:30 वाजण्याच्या सुमारास महामार्गावरील हॉटेल राजस्थानी राजपुरोहीत धाब्यासमोर झालेल्या या अपघातात बसमधील तीन विद्यार्थी, तीन शिक्षक असे सहाजण जखमी झाले आहेत. सर्व जखमींची प्रकृती स्थिर आहे.

आर्यन अमोल गंगावणे (वय 14), असिफ इम्तियाज पठाण (वय 13) व आर्या किशोर भोईटे (वय 13) हे विद्यार्थी जखमी झाले आहेत. तर सुरेश रामचंद्र यादव (वय 42), उमेश गोपाळराव देशमुख (वय 55) व हनुमंत गोरोबा माने (वय 35) हे शिक्षक अशी जखमी झालेल्यांची नावे आहेत. दरम्यान, बुधवारी सकाळी 6:30 वाजण्याच्या सुमारास विद्यार्थ्यांच्या शालेय सहलीच्या बसचा महामार्गावर बेलवडे हवेली गावच्या हद्दीत अपघात झाला. अपघात झाला त्यावेळी बसमधील सर्वच विद्यार्थी साखरझोपत होते. अचानक अपघात झाल्यामुळे विद्यार्थ्यांच्या किंचाळ्यांनी संपूर्ण परिसर हादरला.

याबाबत घटनास्थळावरून मिळालेली माहिती अशी की, वाघोली ता. कोरेगाव येथील भारत विद्या मंदिर व कनिष्ठ महाविद्यालयाची शालेय सहल दोन दिवसापूर्वी दोन एसटी बसने कोकण दर्शनासाठी गेली होती. कोकण दर्शन झाल्यानंतर रात्री सहलीच्या दोन्ही बस कणकवलीहून फोडांघाटमार्गे परत वाघोली येथे शाळेकडे निघाल्या होत्या. दरम्यान, बस (क्र. चक14-8492) बेलवडे हवेली ता. कराड गावचे हद्दीत आल्यावर महामार्गालगत असलेल्या हॉटेल राजस्थानी ढाब्यावरून एक मोठा कंटेनर (क्र. कठ67इ9179) अचानक महामार्गावर आला.

त्यावेळी सहलीच्या बसवरील चालकाचे बसवरील नियंत्रण सुटल्याने बस सरळ कटंनेरला जाऊन धडकली. बस वेगात जास्त असल्याने बसचा डाव्या बाजूचा भाग कंटेनरमध्ये घुसल्याने डाव्या बाजूला बसलेले विद्यार्थी आर्यन गंगावणे, आसिफ पठाण व आर्या भोईटे आणि सुरेश यादव, उमेश देशमुख, हनुमंत माने हे शिक्षक गंभीर जखमी झाले.

अपघाताची माहिती मिळताच परिसरातील नागरिक व तळबीड पोलीस ठाण्याचे सपोनि राहुल वरोटे यांनी तात्काळ अपघातस्थळी धाव घेतली. त्यांनी परिस्थितीचे गांभीर्य ओळखून जखमी विद्यार्थ्यी व शिक्षकांना रुग्णालयात नेण्यासाठी कराड, उंब्रज व महामार्ग प्राधिकरण येथून रूग्णवाहीका मागवून घेतली. सहलीच्या दोन बस होत्या.

त्यातील पाठीमागून आलेल्या दुसऱ्या बसमधील बस चालक व शिक्षकांनी आपल्याच शालेय सहलीच्या बसला अपघात झाला असून अपघातात जखमी झालेले विद्यार्थी पाहून शिक्षक व बाकीचे विद्यार्थीही घाबरले होते. अपघातातील दोन विद्यार्थी व तीन शिक्षकांना उपचारासाठी कराड येथील कृष्णा रूग्णालयात दाखल करण्यात आले असून आर्या भोईटे या विद्यार्थिनीला उपचारासाठी सातारा येथील सातारा डाग्नोस्टिक सेंटर याठिकाणी दाखल केले आहे.  तळबीड पोलीस ठाण्यात अपघाताची नोंद झाली आहे. याप्रकरणी सपोनि राहुल वरोटे मार्गदर्शनाखाली पोलीस हवालदार ए. व्ही. रजपूत तपास करत आहेत.