पिंपरी, (प्रतिनिधी) – हॉंगकॉंगमधून फसवणुकीचे रॅकेट चालवणाऱ्या व्यक्तीसाठी काम करणाऱ्या पाचजणांना पिंपरी चिंचवड पोलिसांच्या सायबर क्राइम विभागाने अटक केली. महिनाभरात नागरिकांची फसवणूक करून मिळालेले चार कोटींहून अधिक रुपये क्रिप्टोकरन्सी द्वारे हॉंगकॉंग मधील मुख्‍य सूत्रधाराला पाठविले.

जुनेद मुख्तार कुरेशी (वय 21, रा. टिंगरे नगर, पुणे), तौफिक गफ्फार शेख (वय 22), सलमान मन्सूर शेख (वय 22), अब्दुल अजीज अन्सारी (वय 23, तिघेही रा. इंदिरा नगर, लोहगाव रोड, पुणे), आकिफ अन्वर आरिफ अन्वर खान (वय 29, रा. कोंढवा खुर्द, पुणे) अशी अटक केलेल्या आरोपींची नावे आहेत. गुन्हे शाखेचे पोलीस उपायुक्त संदीप डोईफोडे यांनी दिलेल्‍या माहितीनुसार, एका महिलेने फसवणूक झाल्‍याबाबत हिंजवडी पोलीस ठाण्यात गुन्हा दाखल आहे.

या गुन्ह्याचा समांतर तपास सायबर सेलकडून केला जात होता. फिर्यादी महिलेला इंस्टाग्रामवर शेअर मार्केट गुंतवणूक संदर्भात जाहिरात दिसली. त्‍यानंतर ती महिला आरोपींच्‍या संपर्कात आली. आरोपींनी गुंतवणुकीच्‍या नावाखाली वेगवेगळ्या बँक खात्यावर 31 लाख 60 हजार रुपये घेतले. फिर्यादीनी रक्कम परत मागितली असता ती रक्कम देण्यासाठी आरोपींनी चॅरिटी डोनेशन म्हणून आणखी चार लाख रुपये घेतले.

फिर्यादीने ज्या बँक खात्यांवर पैसे पाठवले होते, त्या खात्यांचे सायबर सेलने तांत्रिक विश्लेषण केले. त्यानुसार बँक खाते हाताळणारे आरोपी निष्पन्न झाले. पोलिसांनी पाच जणांना अटक केली. त्यांच्याकडून सात मोबाइल फोन, रोख रक्कम मोजण्याची मशीन, आठ डेबिट कार्ड, 12 चेकबुक, एक पासबुक आणि सात लाख रुपये रोख रक्कम जप्त केली.

अटक केलेल्या पाच जणांकडे तब्बल 120 बँक खात्यांचे तपशील आढळून आले. त्या सर्व खात्यांवर आरोपींनी फसवणुकीच्या वेगवेगळ्या प्रकारणांमधील पैसे घेतले आहेत. बँक खात्यात पैसे आल्यानंतर आरोपी ते पैसे काढून घेत. त्यानंतर पैसे युएसडीटी क्रिप्टो करन्सी मार्फत हॉंगकॉंग या देशात पाठवत असत. आरोपींनी आजवर चार कोटी रुपयांहून अधिक पैसे हॉंगकॉंग येथे त्यांच्या म्होरक्याला पाठविली आहे.

अशी करतात फसवणूक
या प्रकरणातील मुख्य आरोपी ग्रेग हा हॉंगकॉंग येथून फसवणुकीचे नेटवर्क चालवतो. हॉंगकॉंगमधून सोशल मीडियासाठी जाहिराती आणि लिंक तयार केल्या जातात. त्या जाहिराती पाहून कोणी संपर्क केल्यास त्या नागरिकांना लगेच फोन येण्यास सुरुवात होते. शेअर मार्केट मधील गुंतवणूक सुरक्षित आणि फायदेशीर असल्याचे सांगितले जाते.

ही कामगिरी पोलीस आयुक्त विनयकुमार चौबे, अपर आयुक्त वसंत परदेशी, उपायुक्त संदीप डोईफोडे, सहायक आयुक्त विशाल हिरे यांच्या मार्गदर्शनाखाली वरिष्ठ निरीक्षक संतोष पाटील, सहायक निरीक्षक प्रवीण स्वामी, उपनिरीक्षक सागर पोमण, अंमलदार नितेश बिचेवार, अतुल लोखंडे, श्रीकांत कबुले, कृष्णा गवळी, रजनीश तारू, सौरभ घाटे, आशा सानप, ईश्वरी आंभरे यांनी केली आहे.