SBI New Rule : स्टेट बँक ऑफ इंडियाच्या (SBI) काही ग्राहकांसाठी महत्त्वाची बातमी आहे. 1 ऑक्टोबर 2026 पासून BSBD खात्यातून ठरावीक मर्यादेपेक्षा जास्त वेळा पैसे काढल्यास अतिरिक्त शुल्क द्यावे लागणार आहे. त्यामुळे जनधन किंवा झिरो बॅलन्स प्रकारचे खाते असलेल्या ग्राहकांनी हा नियम जाणून घेणे गरजेचे आहे.

महिन्यात 4 वेळा कॅश काढणे फ्री –

SBIच्या माहितीनुसार, BSBD खात्यातून महिन्यात 4 वेळा कॅश काढणे मोफत असेल. तुम्ही ATM किंवा बँकेच्या शाखेतून पैसे काढले तरी ही मर्यादा लागू असेल.

मात्र, महिन्यात 4 वेळांपेक्षा जास्त पैसे काढल्यास प्रत्येक अतिरिक्त व्यवहारासाठी ₹15 आणि त्यावर 18 टक्के GST द्यावा लागेल. म्हणजेच एका व्यवहारासाठी जवळपास ₹17.70 शुल्क आकारले जाईल.

उदाहरणार्थ, महिन्यात पाचव्यांदा पैसे काढल्यास पहिल्या चार व्यवहारांवर कोणतेही शुल्क लागणार नाही. मात्र पाचव्या व्यवहारासाठी ₹15 अधिक GST आकारला जाईल. सहाव्यांदा पैसे काढल्यास पुन्हा हेच शुल्क द्यावे लागेल.

UPI आणि ऑनलाइन व्यवहारांवर शुल्क नाही –

या नियमामुळे UPI, इंटरनेट बँकिंग, मोबाइल बँकिंग, NEFT आणि RTGS व्यवहारांवर कोणतेही अतिरिक्त शुल्क लागणार नाही. म्हणजेच डिजिटल पद्धतीने कितीही वेळा पैसे पाठवले किंवा पेमेंट केले तरी या नियमातील ₹15 शुल्क आकारले जाणार नाही.

BSBD खाते म्हणजे काय?

BSBD म्हणजे Basic Savings Bank Deposit Account. हे सर्वसामान्यांसाठी असलेले मूलभूत बचत खाते आहे. या खात्यात किमान शिल्लक ठेवण्याची गरज नसते. जनधन किंवा झिरो बॅलन्स प्रकारच्या खात्यांशी याचा संबंध आहे.

ग्राहकांनी काय करावे?

1 ऑक्टोबर 2026 पासून BSBD खात्यातून पैसे काढताना महिन्यात किती वेळा कॅश काढले आहे, याचा हिशोब ठेवा. 4 व्यवहारांनंतर पैसे काढल्यास अतिरिक्त शुल्क लागू होऊ शकते. त्यामुळे शक्य असेल तेव्हा UPI किंवा इतर डिजिटल पेमेंटचा वापर केल्यास हे अतिरिक्त शुल्क टाळता येईल.