Satara Zilha Parishad – सातारा जिल्हा परिषदेच्या सभापती निवडी आणि जिल्हा नियोजन समितीच्या सदस्य निवडीमध्ये भारतीय जनता पार्टीने वर्चस्व आखण्याच्या दृष्टीने धोरणात्मक पावले उचलले आहेत. आगामी सातारा जिल्हा बँक आणि सर्व राजकीय नाड्या आपल्या ताब्यात ठेवण्याची भारतीय जनता पार्टीची राजकीय आकांक्षा आहे. जिल्हा नियोजन समितीवर प्रशासक राजा असताना पालकमंत्री शंभूराज देसाई यांच्या स्थानीय वर्चस्वाला आव्हान देऊन नियोजन समितीवर आपला पगडा कायम ठेवण्याच्या दृष्टीने भारतीय जनता पक्षाचे चाणक्य आता सरसावले आहेत. सार्वजनिक बांधकाम मंत्री शिवेंद्रसिंहराजे भोसले, ग्राम विकास मंत्री जयकुमार गोरे यांनी भारतीय जनता पार्टीचे जिल्हा परिषदेच्या निवडणुकीत उत्तम संतुलन राखत भारतीय जनता पार्टीचे अध्यक्ष उपाध्यक्ष निवडून आणले. यामध्ये कराड उत्तरचे आमदार मनोज घोरपडे व कराड दक्षिणचे आमदार व भाजपचे जिल्हाध्यक्ष डॉ. अतुल भोसले यांनी सुद्धा महत्त्वपूर्ण भूमिका बजावली. सातारा जिल्हा परिषदेच्या सभापती निवडी चार एप्रिल रोजी होत आहेत. त्यानंतर पुढील आठवड्यामध्ये सातारा जिल्ह्याला निधी वितरण करणारी जिल्हा नियोजन समिती याच्या 40 सदस्यांच्या निवडी असून त्यासाठी 426 सदस्य मतदान करणार आहेत. भाजपचे चाणक्य सक्रिय यामध्ये जिल्हा परिषदेचे 33 नगरपालिकेचे पाच व नगरपंचायतीचे दोन असे 40 सदस्य निवडले जाणार आहेत. नियोजन समितीचे एकूण मतदान 426 आहे. जिल्हा परिषदेचे 65 नगरपालिकेचे नवनगराध्यक्ष आणि 233 नगरसेवक तसेच नगरपंचायत समिती 119 मतदान आहे. भारतीय जनता पार्टीकडे 17 पैकी 10 नगरपालिकांवर वर्चस्व आहे. शंभूराज देसाई, शिवेंद्रसिंहराजे भोसले, मनोज घोरुडे, जयकुमार गोरे तसेच सातारा जिल्हा परिषदेमध्ये सर्वाधिक 33 सदस्यांचे संख्या व त्यांनी जुळवले आहे. त्यामुळे नियोजन समितीवर पालकमंत्री शंभूराज देसाई यांचे वर्चस्व कमी करण्याच्या दृष्टीने भाजपचे चाणक्य सक्रिय झाले आहेत. त्यामुळे तेथेही राजकारणातील सर्व हातखंडे वापरले जातील असा अंदाज आहे. दुरंगी सामना रंगणार सातारा जिल्ह्याचा वार्षिक पत आराखडा तब्बल साडेसातशे कोटीचा आहे. त्या निधीच्या वितरणामध्ये पालकमंत्री यांच्या अध्यक्षतेखाली सक्रिय असणारी समिती या निधीच्या वितरणाचे प्रादेशिक संतुलन राखत असते. तसेच स्थानिक स्वराज्य संस्थांमधील सदस्यांना प्रत्यक्ष जिल्हा प्रशासनाच्या कारभाराचा अनुभव मिळावा यासाठी 40 सदस्यांना समितीवर सदस्यपदी घेतले जाते. यामध्ये पुन्हा शिवसेना राष्ट्रवादी विरुद्ध भारतीय जनता पक्ष असा दुरंगी सामना रंगणार आहे. एप्रिलच्या दुसऱ्या आठवड्यामध्ये साधारण या निवडी केल्या जातील असा राजकीय विश्लेषकांचा अंदाज आहे. झेडपी सभापती निवडीकडे लक्ष सातारा जिल्हा परिषदेच्या सभापती निवडी मध्ये कोणत्या तालुक्याला संधी मिळणार हा औत्सुक्याचा विषय आहे. भारतीय जनता पार्टीने 33 संख्याबळ मिळवून येथे बहुमत सिद्ध केले आहे. त्यामुळे महायुती मधील मित्र पक्षांना किती संधी मिळणार हा पुन्हा वादाचा विषय आहे. भारतीय जनता पार्टीमध्ये कराड उत्तर आणि दक्षिणला सभापती पदे मिळणार का ? याविषयी डॉ. अतुल भोसले आणि आमदार मनोज घोरपडे यांची भूमिका महत्त्वाची ठरणार आहे.
