कोयनानगर : पाटण-संगमनगर धक्का मार्गावरील वाजेगाव येथे सुरू असलेल्या नवीन पुलाच्या कामाला मुसळधार पावसाचा मोठा अडथळा निर्माण झाला आहे. पुलासाठी टाकलेला भराव पावसामुळे खचल्याने कराड-चिपळूण मार्गावरील वाहतूक खोळंबली आहे. प्रशासनाने तातडीने खबरदारी घेत मोठ्या वाहनांना या मार्गावर बंदी घातली असून, छोट्या वाहनांना मर्यादित प्रवेश देण्यात आला आहे. कराड-चिपळूण मार्ग हा मोठ्या प्रमाणात रहदारी असलेला महत्त्वाचा मार्ग आहे. भराव खचल्याने कोयनानगर, वाजेगाव, संगमनगर, पाटण आणि चिपळूणकडे जाणाऱ्या प्रवासी, स्थानिक नागरिक आणि व्यापाऱ्यांना मोठ्या अडचणींचा सामना करावा लागत आहे. रस्ते व महामार्ग विभागाने खचलेला भराव पुन्हा भरण्याचे काम युद्धपातळीवर सुरू केले आहे, परंतु सततच्या पावसामुळे कामात अडथळे येत आहेत, त्यामुळे मार्ग कधी सुरळीत होईल याबाबत अनिश्चितता आहे. वाहतूक व्यवस्था सुरळीत ठेवण्यासाठी प्रशासनाने नेरळे-मेंढेघर मार्गावरून पर्यायी वाहतूक वळवली आहे. या मार्गावर पोलीस प्रशासन सतर्क असून, उपविभागीय पोलीस अधिकारी विजय पाटील आणि सहाय्यक पोलीस निरीक्षक एस. के. ओळेकर यांच्या देखरेखीखाली आवश्यक यंत्रणा कार्यरत आहे. हा मार्ग वाहतुकीसाठी अत्यंत महत्त्वाचा असल्याने, भरावाचे मजबुतीकरण योग्यरित्या न केल्याने ही परिस्थिती उद्भवली, अशी टीका स्थानिक नागरिकांतून होत आहे.
