मोरगिरी : पाटणमध्ये सत्ता करणाऱ्या मंडळींनी सत्तेच्या काळात समाजाचा उपयोग व फायदा करून घेतला. मात्र, समाजाच्या हिताचे जिल्ह्यातील देखणे स्मारक तालुक्यात उभे करू शकले नाहीत हे समाजासाठी दुर्दैव आहे. डॉ. बाबासाहेब आंबेडकर स्मारकाच्या नूतनीकरणासाठी अवघ्या एक वर्षापूर्वी तोंडी मागणी केल्यानुसार पाटणमधील डॉ. बाबासाहेब आंबेडकर यांचे तालुक्यातील देखणे स्मारक उभे करण्यासाठी पहिल्या टप्प्यातील ५० लाख रुपये निधी दिला. एक वर्षात पहिल्या टप्प्यातील काम पूर्ण करून पुढील वर्षापर्यंत बाकीचा निधी देऊन एकूण 1 कोटी रूपयेपर्यंतचे देखणे स्मारक उभे करणार आहे, अशी ग्वाही पालकमंत्री शंभूराज देसाई यांनी दिली. पाटण येथे डॉ. बाबासाहेब आंबेडकर स्मारकाच्या भूमिपूजन प्रसंगी कार्यक्रमात ते बोलत होते. यावेळी आप्पासाहेब मगरे, रविंद्र सोनवले, सचिन कांबळे, रविंद्र बनसोडे, विजय सरगरे, चंद्रकांत कांबळे, संजय असवले, अशोकराव देवकांत उपस्थित होते. ना. देसाई म्हणाले, समाजाच्या हितासाठी कायम तत्पर असून यापुढे उघडा डोळे पहा नीट या उक्तीप्रमाणे समाजानेही एकीने राहून समाजाचा विकास साधावा असे आवाहन केले. यावेळी कार्यक्रमाचे प्रास्ताविक रविंद्र सोनवले तर आभार सचिन कांबळे यांनी मानले.या कार्यक्रम प्रसंगी डॉ.बाबासाहेब आंबेडकर संयोजन समिती,बौद्ध महासंघ समिती व समाजातील तालुक्यातून आलेले सर्व नागरिक,कार्यकर्ते मोठ्या संख्येने उपस्थित होते.
