Satara News : गणपती बाप्पाच्या स्वागताने आनंदलेल्या साताऱ्यात (Satara News) गुरुवारी परंपरेनुसार लाडक्या गौराईचे मोठ्या भक्तिभावाने आणि ढोल-ताशांच्या गजरात आवाहन करण्यात आले. आज शुक्रवारी संपूर्ण जिल्हाभरात अत्यंत भक्तिमय आणि उत्साही वातावरणात श्री गौरी पूजन पार पडत आहे.

शनिवारी लाडक्या आईला जड अंतःकरणाने निरोप दिला जाणार आहे. या तीन दिवसांच्या पाहुणचाराच्या सोहळ्यामुळे सध्या सातारची प्रत्येक गल्ली, पेठ आणि घर भक्तीच्या अलौकिक रसात पूर्णपणे चिंब भिजले आहे. या पूजना मुळे घरोघरी भक्तीचा अनोखा मेळा भरला आहे.

​मुखवटे अन् पारंपरिक साजशृंगार

यंदा सातारच्या (Satara News) बाजारपेठेत गौरीच्या वेगवेगळ्या मोहक रूपांतील मुखवटे आणि मूर्तींना मोठी पसंती मिळाली. धातूच्या, मातीच्या आणि शाडूच्या अत्यंत आकर्षक मूर्तींसह पारंपरिक खड्याच्या गौराईची स्थापना घरोघरी करण्यात आली आहे.

महिलांनी अत्यंत श्रद्धेने आणि प्रेमाने गौरीसाठी विशेष वेळ काढून रेशमी पैठणी, जरीची वस्त्रे, नथ आणि मोत्याचे दागिने घालून गौराईला अतिशय सुंदर रूप दिले आहे. या पूजनाला पारंपरिक साज आणि घरोघरी भक्तीची साथ आहे.

​पर्यावरणपूरक आणि कल्पक आरास

यंदाच्या सजावटीत कल्पकता आणि धार्मिक परंपरेचा सुंदर मेळ दिसून येत आहे. मखमलीचे मखर, ताज्या फुलांच्या सुवासिक माळा, आणि डोळ्यांचे पारणे फेडणाऱ्या विद्युत रोषणाईने प्रत्येक घर उजळून निघाले आहे. अनेक ठिकाणी इको-फ्रेंडली संकल्पनेवर आधारित नैसर्गिक वनस्पती आणि धान्याची समृद्ध आरास करून निसर्गाशी घट्ट नाते जोडले गेले आहे.

​पंचपक्वान्न आणि पुरणपोळीचा नैवेद्य

गौरी पूजनाच्या पावन दिवशी सातारच्या घराघरांत सुग्रास अन्नाचा दरवळ पसरला आहे. परंपरेनुसार १६ भाजी-पाल्याची विशेष भाजी, खमंग कटाची आमटी, खुसखुशीत पुरणपोळी, अळूची वडी आणि निरनिराळ्या मोदकांचा महानैवेद्य गौराईला अर्पण करण्यात आला.

ओवसा भरण्यासाठी आणि महाप्रसादाचा लाभ घेण्यासाठी आप्तेष्ट, पाहुणे आणि शेजाऱ्यांची घराघरांत मोठी भाऊगर्दी झाली असून, महिलांचा उत्साह आणि आनंद गगनात मावेनासा झाला आहे.नैवेद्य आणि आकर्षक आरसेने घराघरांत मांगल्याचे वातावरण आहे.

​शनिवारी पारंपरिक (Satara News) भक्तिगीतांच्या सुरांमध्ये आणि लाडक्या गौराईला निरोप दिला जाईल. या पावन सोहळ्याने सातारची अलौकिक संस्कृती आणि धार्मिक परंपरा पुन्हा एकदा नव्याने आणि तेजाने आकाराला आली आहे.गौरी मातेच्या कृपाशीर्वादाने घराघरात सुख, शांती, समृद्धी, आरोग्य आणि आनंद नांदो, अशी प्रार्थना! घरोघरी केली जात आहे.